Совети за правилно мерење притисок: Грешки кои дополнително го креваат притисокот, а не сме ни свесни!

Високиот крвен притисок е погубен за современиот човек, а ја погодува речиси секоја втора возрасна личност. Често, особено во почетната фаза не дава никакви симптоми, а кога ќе почнат да се покажуваат – некои органи, на пример, срцето, мозокот, бубрезите или белите дробови, веќе се оштетени.

Хипертензијата најчесто се открива на систематски преглед, па затоа е важно повремено да го проверувате своето здравје. Оние кои веќе знаат дека боледуваат од крвен притисок треба редовно да го контролираат, но само под услов редовно да ја земаат пропишаната терапија. Мерењето на притисокот во овој случај служи исклучиво заради вреднување на терапискиот ефект на лековите и потребата нешто да се смени во терапијата.

Се верува дека притисокот измерен во ординацијата често е малку е повисок од реалниот заради познатиот синдром на бел мантил. Заради тоа најдобро е притисокот да се мери дома, да се бележат резултатите и да му се однесат на лекарот за тој да може да ја следи состојбата и да ја одреди вистинската терапија.

10 совети до кои би требало да се придржувате за време на мерењето на крвниот притисок за добиените вредности да можат да бидат што е можно поуверливи:

1. Притисокот секогаш треба да се мери во исто време од денот за вредностите да бидат споредливи;
2. Притисокот е најдобро да се мери наутро, во кревет, и навечер пред одење на спиење;
3. Пред мерењето обавезно треба да се оди во тоалет затоа што полната бешика го крева притисокот;
4. Најмалку половина час пред мерење не би требало да пиете алкохол ни да пушите, а непосредно пред мерењето не треба да се пие ни кафе;
5. Разговорите, без разлика дали се во живо или преку телефон, исто така, го креваат притисокот, затоа за време на мерењето треба да се молчи;
6. Притисокот никогаш не треба да се мери преку облека, туку на гола кожа;
7. Положбата на рацете треба да биде соодветна, затоа е неопходно внимателно да се прочита упатството за употреба на апаратот каде е детално опишано каде кој дел од апаратот се поставува;
8. Мускулите на целата рака, вклучително и дланката, мора да бидат опуштени, а личноста која го мери притисокот да биде мирна;
9. Ако сакате да проверите дали добро сте го измериле притисокот, паузата меѓу две мерења треба да биде долга најмалку две минути;

10. Правилно е притисокот да се мери на двете раце, да се бележат двете вредности. Крвниот притисок кај повеќето пациенти е највисок наутро, подоцна опаѓа, а навечер повторно почнува да расте. Меѓутоа ова не е правило затоа што кај некои луѓе се случува потполно спротивен процес.