Во студија, чии резултати се објавени на medRxiv, но која се уште не поминала стручна рецензија, биле анализирани нивоа на антитела меѓу возрасни кои се опоравиле од умерено тешка форма на КОВИД-19. Утврдено е дека лицата помлади од 30 години имале пониско ниво на антитела од постарите лица. Резултатите укажуваат на тоа дека сите, а особено младите возрасни лица, треба да се вакцинираат против КОВИД-19, дури и ако ја прележале болеста.
“Знам дека многумина размислуваат: ‘Прележав КОВИД-19, па не мора да се вакцинирам“, вели Џон Алкорн, професор по педијатрија на медицинскиот факултет во Питсбург и главен автор на студијата.
“Но, нашата студија укажува на тоа дека секој пациент по прележување на КОВИД-19, особено младите лица, во организмот немаат доволна количина на антитела, кои се дел од имунолошката меморија“.
Имунолошката меморија се создава при првата средба на имуниот систем со туѓ антиген. Таа се состои од Т и Б мемориски клетки и му обезбедува на имуниот систем одредени информации за одредени патогени. На тој начин имуниот систем може поефикасно и побрзо да се бори против болеста по почетната инфекција.
Студијата го проучила имунолошкиот одговор на 173 возрасни лица на возраст од 19 до 79 години, кои прележале блага до умерена форма на КОВИД-19 и не им била потребна хоспитализација. На сите од примерок крв им се измерени антитела на коронавирус.
Научниците утврдиле дека неко меѓу нив имале високи нивоа на антитела, други ниски нивоа. Високите нивоа на антитела успеале да го неутрализираат КОВИД-19, додека ниските не.
Целта на студијата не била да воспостави одреден праг на нивоа на антитела потребни за да се спречи нова инфекција со КОВИД-19, туку со неа се сакало да се појасни дека зараза и понатаму е можна, без оглед на присутноста на антитела во организмот.
“Многу луѓе ја прележаа болеста, а поголем е бројот на оние кои по тоа, престануваат со примена на мерките на претпазливост“, вели Алкорн.
Се уште има многу непознати работи кога е во прашање КОВИД-19 и природниот имунитет – на пример, зошто некои луѓе имаат високо ниво на антитела, кое ниво е доволно за заштита од повторна инфекција и колку долго може да потрае природно стекнатиот имунитет.
Истовремено, предупредува Алкорн, има многу дезинформации кои може да влијаат на одлуката за (не)вакцинирање на оние кои прележале КОВИД-19.
Тој вели дека луѓето често се дезинформирани кога се работи за природно стекнатиот имунитет и погрешно веруваат дека нема повторно да се разболат ако еднаш прележале КОВИД-19.
Голема израелска студија покажала дека природно стекнатиот имунитет во комбинација со вакцината нуди многу поголема заштита од повторно заболување од КОВИД-19, во однос на заштитата стекната само по природен пат.
Американскиот Центар за контрола и превенција на болести (ЦДЦ) препорачува и лицата кои прележале ковид да се вакцинираат оти се покажало дека вакцините нудат подобра заштита од самиот природно стекнат имунитет и бидејќи е нејасно колку долго трае природниот имунитет.
