Вчера вечер Европската агенција за лекови (ЕМА) соопшти дека ги проучува податоците пред одлуката дали ќе се приклони кон одлуката на Американската агенција за лекови (ФДА) која во средата одобри за бустер доза, различна вакцина од првичната вакцина.
“Забележуваме ветувачки резултати во студиите кои потврдуваат дека тој пристап со одредени комбинации на вакцини носат силен имунолошки одговор отколку кога иста вакцина се користи за дополнителна доза“, изјави на прес конференцијата Марко Кавалери, одговорен за стратегија на вакцините во ЕМА.
Во Македонија одобрена и отпочната е вакцинација на населението со трета доза на вакцината Фајзер, за да се зајакне имунитетот на вакцинираните лица, кој се чини дека се намалува по неколку месеци.
Истражување објавено во САД минатата недела покажало дека лицата кои примиле вакцина Џонсон и Џонсон, која како и АстраЗенека, користи класична технологија на вирусни вектори, подобро се заштитени со бустер доза на мРНА вакцини, како Фајзер или Модерна.
“Се чини дека мРНА вакцините како бустер доза делуваат многу подобро на стимулирање на имуниот систем и можат да предизвикаат навистина силен имунолошки одговор“, вели Кавалери.
Истражување кое вчера го објави Фајзер наведува дека трета доза од нивната вакцина е 95,6 проценти ефикасна против симптоматски форми на болеста.
Комбинирањето на вакцини, одобрено од ФДА, во САД се нарекува ‘mix and match’. Бустер доза е доза вакцина која се применува со поголемо временско растојание од примарната серија вакцинација, за да се продолжи должината на траење на заштитата стекната со примарното вакцинирање.
ФДА го авторизираше користењето на Фајзер вакцината како дополнитела вакцина, а треба да се прими најмалку 6 месеци по примената втора доза вакцина.
