Како да си помогнеме? Зошто воопшто толку многу жени патат од студени нозе и раце?…
За почеток жените имаат помалку мускулно, „топло“ ткиво, од мажите, па побрзо се „смрзнуваат“. Следната причина е што луѓето на стапалата и дланките имаат прилично тенка кожа без слој масно ткиво – едноставно така сме градени – со масен слој најдобро е заштитен трупот сосе виталните органи, а рацете и нозете се буквално на периферијата. Жилите таму се потенки и крвта побавно циркулира, уште ако носиме и тесни обувки или чорапи кои дополнително ја забавуваат циркулацијата, ете студени нозе.
Првиот совет би бил: за време на студените денови да се носат удобни, широки чизми, а и чорапи. Но нормално е назима одвреме – навреме да ни се смрзнат прстите на рацете и на нозете, но да се хронично ладни?! Кога прстите ни се ладни, а надвор не е толку студено тогаш причините се други. На пример, тоа може да има врска со хормоните, пушењето, стресот, нискиот крвен притисок или, пак, недостатокот на телесна активност. Недостатокот на витамин Б, магнезиум или железо, исто така, може да биде причина, па затоа е добро да се направи проверка на крвната слика. Но во меѓувреме…
Спас за ладни нозе
Велат, чизмите главата ја чуваат – тоа е факт, но за подолга прошетка препорака е да се носат волнени чорапи или барем термо чорапи. Она што може да се направи дома е нозете да се држат во топла купка, која ќе ја поттикне циркулацијата и ќе ги згрее не само стапалата, туку и целото тело. Воедно и супер релаксира после долг и напорен ден.
Како да се стоплат смрзнати раце!?
Ова може да се направи и, на пример, додека сте на работа (а рацете ви се смрзнати): неколку движења за истегнување и неколку вежби ќе ја поттикнат циркулацијата: стискајте ја дланката, мрдајте ги прстите, вртете со дланките, истегнете ги рацете. Оваа мала фискултура има и придружни позитивни ефекти: ќе ве расони. Дека надвор треба да носите ракавици тоа го знаете, но прашањето е какви?! Моделот е прашање на вкус, но внимавајте најдобро е да се од природен материјал.
Ако генерално имате проблем со циркулацијата, треба да знаете дека многу помага туширањето, и тоа наизменично со топла и ладна вода, одењето во сауна со промена на температурата. Може да си помогнете и со она што го внесувате во организмот, односно преку храната и зачините: чили, пипер, ѓумбир ја поттикнуваат циркулацијата, па затоа користете ги. Меѓу оброците напијте се чај од ѓумбир, ќе ви биде од голема корист.
