Иако не изобилува со витамин Ц како свежите плодови, сувото овошје содржи приближно иста количина хранливи материи, само во кондензирана форма, па една порција може да обезбеди голем процент од дневниот препорачен внес на многу витамини, минерали и влакна.
Сувото овошје е одличен извор на фолна киселина, калиум и антиоксиданти, особено полифеноли – корисни за здравјето бидејќи го поттикнуваат протокот на крв, благотворно делуваат на дигестивниот систем, спречуваат оксидативно оштетување на клетките и го намалуваат ризикот од појава на бројни заболувања.
Резултатите од неколку студии покажуваат дека лицата кои редовно консумираат суво овошје внесуваат повеќе хранливи материи и помалку се склони кон дебелина отколку оние кои ја немаат оваа навика. Освен тоа, дехидрираното овошје овозможува чувство на ситост, содржи гликемиски индекс со умерена вредност, па затоа е одлично средство за контрола на нивото на шеќер во крвта, но и во превенција на срцеви заболувања – бидејќи го намалува крвниот притисок, како и нивото на лош холестерол.
Добро е познато дека сувите сливи се најдобар природен лаксатив, па со самото тоа и одлично средство за одржување на здрав дигестивен тракт. Сувото грозје, сувите смокви, кајсии и урми изобилуваат со железо и се ефикасен сојузник во борбата со анемија.
