Овогодинешната кампања на Светската федерација за срце, по повод Светскиот ден на срцето 29-ти септември е фокусирана кон заедничка цел – да се инспирира популацијата и секој да си даде ветување на себе да го задржи своeто срце здраво: ветување кон кое луѓето можат да се придржуваат, ветувањe кон кое ќе пристапат индивидуално, ветување кое е насочено кон заедничка цел – здравјето на срцето е за секого, бидејќи секое отчукување на срцето е важно.
Според кампањата која оваа година се води под мотото МОЕТО СРЦЕ, ТВОЕТО СРЦЕ, секој треба да си го постави прашањето: Што можам да направам во овој момент за моето срце и за твоето срце?
- прекини со пушењето!
- користи скали!
- вежбај!
- оди со велосипед на работа!
„Оваа година целта е секој човек да си даде ветување и да се придржува до него. Ветување кое ќе помогне да се постигне целта: здраво срце за секого. Да се понесат пораки кои ќе служат како инспирација. Тоа е можност да се обединат заедно научните кардиолошки здруженија, фондациите за срце, здравствените работници, пациентите и општата популација, политичарите, владите и индустријата за да се унапреди каузата – здраво срце за секого“, вели претседателката на Македонското здружение по кардиологија, проф. д-р Елизабета Србиновска – Костовска.
Светскиот ден на срцето ги информира луѓето од целиот свет дека кардиоваскуларните болести, вклучувајќи ги срцевите болести и мозочниот удар се водечка светска причина за смртност која одзема 17,7 милиони животи секоја година и укажува на активностите што секоја личност може да ги преземе за превенција и контрола на КВБ.
Целта е да се спроведе акција за да се едуцираат луѓето да ги контролираат факторите на ризик како пушењето, нездравиот начин на исхрана и физичката неактивност.
Кардиоваскуларните болести се убиец број еден во светот. Но, не мора да биде така, потенцира проф. д-р Србиновска. Веќе постојат земји каде кардиоваскуларните заболувања имаат пад во морбидитет и морталитет. Ако направиме неколку мали чекори во нашите животи можеме да го редуцираме нашиот ризик за срцеви болести и мозочен удар, да го подобриме нашиот квалитет на живот и да бидеме добар пример за следните генерации.
„Светскиот ден на срцето треба да биде инспирација за сите да го променат своето однесување, со цел подобрување на здравјето на срцето. Треба да се прошири знаењето за тоа како да се спречи прераниот морталитет предизвикан од кардиоваскуларните болести“, подвлекува проф. д-р Србиновска – Костовска.
Дури 80 % од случаите на предвремена смрт можат да се избегнат ако се избегнуваат четирите главни ризик фактори – пушењето, нездравата исхрана, физичката неактивност и злоупотребата на алкохол.
