“Признаваме дека се појавија докази во тоа подрачје и според тоа, мора да бидеме отворени за таа можност и да ги сфатиме импликациите“, изјави Бенедета Алегранци, една од челните луѓе во СЗО преку видеоконференција.
“Можноста за пренос на вирусот преку воздух на јавни места, особено ако се преполни, не може да се исклучи. Меѓутоа, доказите мора да се соберат и да се интерпретираат“, предупреди Алегранци и препорача “ефикасно проветрување на затворените простори и одржување на физичко растојание“.
“Тогаш кога тоа не е можно, препорачуваме носење маска“, истакна Алегранци.
Над 200 меѓународни научници ја повикаа СЗО и мешународната медицинска заедница да “признаат постоење на можност дека вирусот се пренесува и преку воздух“ во напис објавен завчера во списанието Clinical Infectious Diseases од Оксфорд.
СЗО веќе претходно беше критикувана дека доцни со препораките за носењето заштитни маски, а сега е обвинет и бидејќи одбива да ги согледа се побројните показатели за пренос на вирусот преку воздух.
“Епидемијата се забрзува и се уште не сме го достигнале пикот на пандемијата“, предупреди директорот на СЗО, Тедрос Аданом, Гебрејесус на конференцијата за новинарите.
“Се чини дека бројот на жртви е стабилизиран на светско ниво, но во реалноста некои држави остварија значаен напредок во намалување на смртноста, но во други земји расте бројот на починати како последица на КОВИД-19“, истакна Гебрејесус.
