Често се нагласува важноста од водење здрав живот, не само поради себе, туку и поради своите блиски, а особено децата. Денес децата се се повеќе заинтересирани за брза храна и компјутерски игри, а се помалку за здрави активности. Ова го потврдува и поразителната статистика која вели дека се поголем е бројот на деца меѓу 7 и 13 години, кои имаат вишок на килограми. Децата во Македонија, на возраст од 11 до 15 години, за жал, се во топ пет земји со прекумерна тежина кај децата во Европа.
Неактивните деца со лоши навики во исхраната ќе прераснат во возрасни лица со потенцијални здравствени проблеми
Разбирливо, не се сите деца заинтересирани за физички активности, па затоа треба да се биде трпелив, но и да не им се наметнуваат туѓи желби, туку да им се помогне и заеднички да се одбере она што навистина ги интересира и во што ќе уживаат. Заедно обидете се со фудбал, кошарка, пливање, планинарење, боречки вештини… Се додека не го погодите она во кое детето ќе се пронајде! Нека тие активности бидат заеднички – вашите деца нека знаат дека навистина ги поддржувате и заедно со нив живеете таков животен стил.
Ограничете го времето пред компјутер или телевизор. Со забраната нема да постигнете ништо, туку користете го тоа време како награда за други активности и достигнувања. Наместо нови видеоигри или плејстејшн за роденден, подарокот нека биде излет во природа, опрема за некој спорт, членство за одредена спортска активност…
Бидете им пример и покажете им ги сите позитивни страни на здравиот живот. Ако сакате активно и здраво дете, бидете активни и здрави родители.
Усвојување на здрави навики преку игра и забава
Бидете вклучени – нема ништо поважно од здравјето на вашиот дете. Од мали нозе научете ги дека чоколадото и газираните сокови не се добар избор за секојдневна исхрана. Ниту едно дете не се родило знаејќи што е пица или гумени бомбони. Родителите се оние кои им ги овозможиле и ги научиле на овие работи.
Вклучете ги вашите деца во подготовката на храната, секако, соодветно на нивната возраст. Децата мора да научат што е јаболко, портокал, брокула, а како ќе научат подобро ако не експериментираат со храната. Нека заедничките оброци бидат ваш приоритет- во времето кое ќе го поминете заедно пренесете ги здравите навики на своите потомци. Потрудете се тие активности да не бидат само досадни обврски во распоредот, кои ќе ги завршат затоа што мораат, туку нешто што ќе го заинтересира и анимира вашето дете. Вклучете ги и нивните мали другарчиња. На тој начин ќе се чувствуваат како дел од групата, а со тоа ќе ги проширите позитивните навики и врз другите деца.
Бидете трпеливи – промените не се случуваат преку ноќ. Како што лошите навики не сме ги стекнале преку ноќ, така ќе биде потребно и време да се воведат нови, позитивни навики. Нека сето ова биде игра и забава, за децата сами без притисок да го прифатат здравиот начин на живот. Немојте да им да зборувате што не смеат, туку што смеат, и на овој начин ќе постигнете многу повеќе. Неактивните деца со лоши навики во исхраната ќе прераснат во возрасни лица со потенцијални здравствени проблеми, а тоа никако не смееме да го дозволиме.
