Ако малку подобро размислиме, секој од нас ќе се обиде да ги избегне тажните музички ритмови и текстови, особено кога се чувствуваме добро. Причина за тоа е што не сакаме што било да ни го расипе расположението, а свесно или несвесно многу од нас тажната музика ја поврзуваат со своето расположение.
Извлекуваат тага
Многу луѓе, ако се искрени, ќе кажат како во моментите кога ја прекинале љубовната врска, кога ја изгубиле саканата личност, прекинале важно пријателство и слични ситуации, посакале да стиснат „плеј“ копче на некоја од популарните тажни песни. Притоа, очекувано, избираат музика чии текстови најдобро ја опишуваат состојбата во која се наоѓаат. Погодувате? Да, во тој момент се чувствувате уште полошо, а некои и ќе заплачат. Факт е дека тие стихови и музиката ќе ја извлечат целата тага од вас.
Меѓутоа, ако во тие моменти сте мислеле дека тоа е нешто лошо, науката зборува поинаку. Науката потврдува дека тажната музика не прави посреќни и го подобрува нашето ментално здравје. А еве и како:
Песните, можеби се тажни, но носат позитива во мозокот
Дејвид Хурон, професор во Музичката школа и Центарот за когнитивни науки на Универзитетот Охајо, ги проучувал ефектите на тажната музика врз луѓето. Во претходните истражувања се доаѓало до заклучок дека одредена група на луѓе повеќе слушаат тажна музика. Тоа, пред се, се отворени личности кои многу поминале и доживеале во животот и лица кои добро поминувале на тестовите за карактерот.
Позитивни ефекти
Според Хурон, хормонот пролактин е одговорен за позитивните ефекти на музиката на нашите чувства. Пролактинот кој го излачува хипофизата, а влијае на млечните жлезди во телото и е познат и како хормон кој го поттикнува излачувањето на млеко кај доилките се испушта кога сме многу тажни. Додека жалиме, се вели во истражувањето, телото го излачува хормонот како „природна цуцла“ која би ни го олеснала времето на жалење и ќе ни помогне да се носиме со тагата. Затоа тажната музика ја доживуваме како мајка која ќе не утеши кога ни е тешко.
Слично на тоа кога слушаме тажна музика или музика со тажни стихови, телото испраќа сигнали до хипофизата да испушти пролактин. Па затоа, кога ја слушаме всушност го тераме телото да ни обезбеди пријатно опкружување и посреќни чувства.
