Претераното гледање телевизија лошо се одразува врз математичките и јазичните вештини кај децата на возраст меѓу четири и 18 години и тоа може да биде причина за проблеми во однесувањето и навиките околу исхраната. Видеоигрите, иако од една страна ја развиваат моториката и ориентациските способности на децата, негативно влијаат, пред се, кај тинејџерите бидејќи кај нив се појавуваат таканаречените неквалитетни одлуки и проблеми со помнењето. Затоа е препорачливо децата под 18 месеци да не се изложуваат на никаков уред со екран, освен ако не се работи за видеоразговор со блиските. Научниците посочуваат дека телевизорот лошо влијае врз развојот на комуникациските способности и на социјализацијата кај бебињата и малите деца.
За двегодишните деца дозволено е учењето зборови од таблет, но тоа секако е многу поефикасно во присуство на родител. Децата на возраст меѓу три и пет години може да имаат полза од образовните телевизиски серијали, преку коишто учат и си ги подобруваат умствените способности. Од друга страна, пак, многу од содржините и апликациите за паметни телефони и таблети всушност и не се така квалитетни како што се претставени. Кај децата кои се на шестгодишна возраст и постари, се препорачува родителите да стават ограничување во времето поминато пред телевизор. За нив е важна и комуникацијата родител – дете, т.е. да се објаснуваат содржините со коишто децата се среќаваат на интернет, со цел да не станат жртви на дезинформации.
