СЗО зависноста од видеоигри ја смета за психичка болест!

Светската здравствена организација изминатиот викенд донесе одлука дека зависноста од видеоигри е психичка болест.

По седницата на СЗО и официјално е прогласено дека зависноста од видеоигри е психичко пореметување. Оваа одлука е донесена со 194 гласа „ЗА“ на 72. редовно Собрание на СЗО. Треба да се напомене дека ваквото класифицирање не се однесува на какво било играње видеоигри, туку само за она што не може да се контролира и се карактеризира како ненормално однесување.

Психичко пореметување има секоја личност што минува 8, 10 и повеќе часа пред екран, играјќи видеоигри. Поради тоа, оваа личност заборава на своите професионални обврски, но и на личните потреби како што е исхрана, лична хигиена, хидратација и спиење.

Таквите личности поради видеоигрите губат амбиција да се занимаваат со други  работи, губат интерес за социјален живот, немаат пријатели и го запоставуваат семејството. Ваквото однесување доведува до поголеми или помали последици на социјален, здравствен и професионален план, а личноста продолжува да игра без оглед на последиците.

Тогаш кај овие личности докторите дијагностицираaт психичко пореметување, односно зависност од видеоигри.