На прв поглед изгледа како вежба без врска, но овој тест за седење и станување одредува колку сте, всушност, здрави и во каква кондиција сте. Вежбата можете да ја направите дома, трае само неколку секунди и се изведува на подот во удобна облека и обувки или боси.
„Седни-стани“ тестот го осмислил бразилскиот лекар Клаудио Гил Араујо, а со него се мерат работи, кои се есенцијални за одредување на физичката форма – сила, флексибилност и рамнотежа.
Вежбата се изведува така што ќе седнете на подот со вкрстени нозе и ќе се обидете да станете трудејќи се што помалку да се потпирате на рацете или на други делови од телото. Резултатите се рангираат помеѓу 1 и 10.
Ако е вашиот резултат помалку од три, односно вие сте морале да ги користите двете раце, сте се потпреле странично при станувањето, сте губеле рамнотежа и слично, тоа покажува дека сте во многу лоша форма.
Ако вашиот резултат е помеѓу осум и десет (минимално сте се потпирале), тоа значи дека имате одлична кондиција. Секој пат кога ќе изгубите рамнотежа, ви се одзема половина поен.
Ако имате проблеми со колената, би било добро за време на изведувањето на вежбата да имате некој со вас во случај да не можете да станете.
Ако, пак, имате повеќе од 50 години и сте постигнале чиста десетка – честитајте си, бидејќи припаѓате на елитна група!
Во видеото, погледнете како точно се изведува вежбата и се пресметуваат резултатите.
