Студијата која е претставена минатата недела на состанокот на Европското здружение за кардиологија, покажува дека вежбањето кое бара од луѓето мошне брзо да се движат може да предвиди заболување од рак, срцев удар и прерана смрт. За луѓето кои имаат „поголем капациет“ кога е напорното движење во прашање, се вели дека имаат помал ризик од смрт од различни болести.
Учесниците во студијата биле изложени на силни кардио вежби, но вие тоа не морате да го правите за да го проверите своето здравје. Проверете дали можете да се качите по скали во интервал помал од една минута и ќе знаете колкав интензитет на движење може да издржи вашето тело.
Доктор Хесус Петеиро, водач на студијата и кардиолот на Универзитетската болница во Шпанија, вели дека е мошне важно тестот да го направите без застанување. Доколку успеете да ја направите оваа вежба, тогаш вашата кондиција е задоволувачка.
Во студијата учествувале 12 615 луѓе кои имале или се сомневале дека имаат болести на коронарните артерии (пореметување на работата на заслистоците, делумно запушување и сл.). Ја изведувале вежбата и биле следени со ехокардиограф (ултразвучен преглед на срцето) за да се востанови колкава е нивната кондиција. Набљудувана е состојбата на заболувањето и врз основа на тоа се донесени резултати.
Што е метаболен еквивалент?
Мерен е напорот кој учесниците во студијата го вложуваат и тоа е поставено како метаболен еквивалент – МЕТ. Еден МЕТ е еднаков на напорот кој се вложува кога седиме мирно. Брзото одење е еднакво на 3 МЕТ, а трчањето на 6 МЕТ. Оваа студија дефинирала дека добар функционален капацитет е еднаков на 10 МЕТ. Доколку сте способни да се качите по скали меѓу спратовите за 40-50 секунди тогаш сигурно имате 10 МЕТ.
Учесниците во студијата биле следени пет години и се покажало дека ризикот од рак опаднал за 9 отсто, исто толку и ризикот од срцев удар, а за 4 отсто паднал ризикот од каква било друга смрт. Луѓето кои имаат мошне мал функционален капацитет имаат дури за три пати поголем ризик да заболат од карцином и срцеви болести, во однос на оние кои вежбаат напорно движење.
Целта е да се остане без здив
„На кардиолозите им е позната ситуацијата дека луѓето имаат разни срцеви заболувања, но дека имаат истовремено и добра кондиција, па ним им се даваат поголеми шанси за долг живот“, вели д-р Ендрју Фриман и додава дека без оглед што не е директно вклучен во студијата има намера да ги поттикне своите пациенти редовно да вежбаат за да одржуваат што е можно поздрав живот.
Тој предлага 30 минути дневно вежбање „без здив“.
„Целта не е да се онесвестите, но не е лошо ни кога ќе дојдете до точка кога речиси и да не можете да вдишете воздух. Тогаш сте го активирале целиот свој капацитет“, вели д-р Фриман.
Колку е потребно да се вежба секој ден?
Некои прифатени истражувања од медицинска страна препорачуваат да се вежба меѓу два до пет часа неделно, и тоа средно интензивни вежби или час и петнаесет минути до два и пол часа напорни вежби.
Што се однесува, пак, до скалите, качувањето по нив и порано им се препорачувало на кардиоваскуларните болни, но сега е докажано дека овој тренинг е добар за намалување на ризикот од која било болест.
Кондицијата подобрувајте ја и со трчање, возење велосипед, пливање, како и со слични активности.
„Познато ни е дека многу студии не се согласуваат со оваа, но со опсежно истражување се покажало дека напорните вежби се поделотворни за здравјето“, јасен е доктор Хесус Петеиро.
