Тинејџерите се способни да ги збеснат до зацрвенување и да ги доведат до солзи родителите. Но и вие сте биле во истата состојба и вие знаете колку е тешка таа возраст, па обидете се да го пронајдете вистинскиот пристап.
Ако имате депресивен тинејџер не се надевајте дека веднаш по прашањето зошто, ќе добиете смислен и искрен одговор, всушност каков и да е одговор. Зборот зошто не ви врши работа. Помудро е да се пристапи со претпоставка или предлог, обидувајќи се да го смирите детето ако тоа се уште не се заклучило во својата соба со зборовите „и јас сум била во истата положба на твои години“, па продолжете со кратка историја за вашите незгоди како тинејџер. Вашите споделени приказни за личните непријатности во текот на тинејџерските години, обично ја отвораат желбата и на детето да ги сподели со вас, бидејќи сфаќа дека вие можеби имате решение за неговите проблеми, сте го поминале тоа, што автоматски ве прави негов сојузник.
Ако, пак, не минува со добро, тогаш започнете спор со детето. Тинејџерите всушност сакаат да се расправаат, тогаш се најискрени и имаат можност да кажат се што ги мачи, по што се чувствуваат многу подобро.
А и вие ќе се почувствувате подобро откако веќе знаете каков проблем го измачува вашето дете и ако проблемот е во вас ќе имате можност да промените нешто. Вистината е дека тинејџерската депресија обично е резултат на проблеми со родителите кои се обидувате да ги воспитате, соодветно нешто да им забраните, да ги казните и воопшто да не влезете во состојба да го разберете детето. Или станува збор за полудени хормони, љубовни проблеми, проблеми со пријателите и во училиште, недостаток на самодоверба поради изгледот, стрес, недостаток на внимание, па дури и прекумерната технолошка стимулација може да има негативен ефект.
Како изгледа тинејџер во депресија
Лутина, кршење, солзи, честа промена на расположението, главно лошо, агресија, бес, молчење со часови, се само дел од симптомите на депресија кај тинејџер. Кога е во таква состојба детето обично сака да остане само, да поминува со часови пред компјутер, одбива да излегува со пријателите, нема енергија, нема желба и мотивација за ништо, и е обременето со песимизам.
Треба да бидете особено внимателни при појавата на овие знаци бидејќи депресијата обично започнува незабележително, а детето знае успешно да ја маскира и да ја контролира во исто време. Во спротивно, ако не ја препознаете детето може да стигне до употреба на наркотици, алкохол, а понекогаш, за жал, депресијата ги тера тинејџерите да помислат на самоубиство.
За да го спречите сето тоа, важно е навистина да бидете дел од животот на детето, да бидете негов пријател, а не непријател, да бидете трпеливи, да го поддржувате, да покажувате разбирање дури и кога најмалку ве сака, бидејќи во спротивно ќе дојде до прекинување на односот родител – дете. Таквото оддалечување ќе ве спречи да ги видите важните работи и проблемите што го мачат детето.
Бидејќи децата на оваа возраст тешко ги споделуваат и изразуваат своите чувства, добра идеја е да се спријателите со неговите пријатели. Од нив може да дознаете многу за чувствата и загриженостите на вашиот тинејџер.
Ако детето ви е во депресија, еден од добрите начини да ја надминете оваа состојба е да го запишете на спорт, нешто што ќе му даде енергија и ќе му помогне да го расчисти својот ум. Доколку ситуацијата е сериозна, размислете за психотерапевт.
