Тинтусот е состојба која може да биде симптом за здравствено нарушување. Пациентот кој страда од овој проблем кој се нарекува и ѕвонење (зуење) во ушите има чувство дека слуша брмчење, свирење, црцорење или други звуци. Овие звуци може да се слушаат повремено или постојано и со различна гласност. Честопати се засилуваат кога ќе стивне надворешната врева, па тоа треба да се има предвид кога ноќе се обидувате да заспиете во тивка соба. Во ретки случаи звукот го придружува ритамот на срцето. Многу често тинитусот е поврзан со анксиозноста.
Грубите проценки се дека седум проценти од жените и од мажите во текот на животот посетуваат лекар поради вакви проблеми. Сериозното зуење во ушите кое значајно го нарушува животот на луѓето се јавува кај едно до 100 лица.
СИМПТОМИ:
- звуци во ушите, на пример, ѕвонење, шумови, брмчење, свирење;
- звуците се јавуваат одвреме-навреме или се постојани;
- во некои случаи губење на слухот.
Ако имате тинитус, тоа може да биде симптом за здравствено нарушување, како висок крвен притисок или намалени активности на штитната жлезда. Ако бучењето е придружено со болки или гној во ушите, тоа може да се знаци за инфекција во увото. Доколку ваквата состојба е придружена со вртоглавица, тоа може да биде знак за Мениерова болест или некоја невролошка тегоба.
РИЗИК ФАКТОРИ
- создавање ушна кал,
- тумор на слушниот нерв,
- дупнато ушно тапанче,
- изложеност на силни звуци,
- изложеност на ненадејна, многу гласна бучава,
- лекови (аспирин и антибиотици),(се наведува како несакано дејство кај околу 200 лекови),
- оштетување на ушниот полжав поради стареење,
- Мениерова болест,
- нарушување на внатрешно уво,
- висок крвен притисок,
- алергии,
- анемија,
- намалена работа на штитната жлезда,
- синдром на виличен зглоб,
- стрес.
Тинитусот е состојба која предизвикува непријатно чувство и проблеми со концентрацијата и спиењето, Може да влијае и на работата и на личните односи и доведува до психолошки нарушувања. Тинитусот во некои случаи е предизвикан од инфекции или препреки во увото и исчезнува откако болеста ќе се излекува. Но, тинитусот честопати останува и по лекувањето на болеста. Во тој случај конвенционално и алтернативното лекување може да донесе големо олеснување, со ублажување или со придушување на несаканите звуци.
