Студијата која во себе вклучила резултати на преку 100 истражувања открила дека редовното вежбање, одржувањето на здрава телесна тежина и ограничувањето на внесот на алкохол ги намалуваат шансите за појава на рак на дојката.
Жените кои се умерено физички активни имаат за 13 отсто помал ризик од рак на дојката во постменопаузата отколку жените кои се слабо физички активни
Авторите на студијата напоменуваат дека е веќе добро познато оти 50 отсто од случаите на карцином може да се спречат со усвојување на здрави животни навики. За да се намали споменатиот ризик не е неопходно жените да бидат витки како манекенки, ниту редовно да трчаат маратон. На пример, жените кои се умерено физички активни имаат за 13 отсто помал ризик од рак на дојката во постменопаузата отколку жените кои се слабо физички активни. Кога станува збор за појавата на рак пред менопаузата тука, односно во превенцијата може да помогне само високото ниво на физичка активност, и во тој случај ризикот е помал за 17 проценти.
Одржувањето на здрава телесна тежина, исто така, е мошне важно со оглед на тоа дека жените со прекумерна телесна тежина имаат поголем ризик од рак на дојка после менопаузата.
Кога станува збор за алкохолот, дури и умерениот внес на алкохол го зголемува ризикот од рак на дојката. Авторите на студијата заклучиле дека жените кои секојдневно пијат по една мала чаша вино имаат за 5 до 9 проценти поголеми изгледи за појава на карцином.
