Листата работи кои жените не би требало да ги практикуваат во текот на бременоста е прилично долга, а меѓудругото вклучува и консумирање алкохол и пушење цигари, јадење одредена храна… Не треба да се изложуваат на голем физички напор, на високи температури… Истражувањата покажале дека кај трудниците кои биле изложени на високи температури во првите седум недели од бременоста ризикот детето да има проблеми со развој на черепот и долниот дел од ‘рбетот е зголемен. Затоа препораката е да се ограничи времето на седење во топла купка, сауна… на 10 минути, и тоа дури по третиот месец од бременоста. Во првото тримесечје не се препорачува ништо од погоре споменатото.
Стручњаците посочуваат дека во првите три месеци од бременоста трудниците не смеат да дозволат температурата на телото да им се покачи над 38 Целзиусови степени, што се случува, на пример, по 10 минути седење во сауна. Сончањето не е толку опасно, но сепак препораката е седење под сенка – дозволено е во утринските или попладневните часови. Треба да се има на ум и тоа дека во бременоста кожата е почувствителна во бременоста, па затоа треба да се користи средство за сончање со најголем заштитен фактор.
Не е познато како точно влијаат УВ зраците на бебето додека е во мајчината утроба, но низа истражувања укажуваат на тоа дека ја намалуваат ефикасноста на суплементите што содржат фолна киселина, што е важна за правилен развој на бебето. Пливањето се смета за безбедна активност во текот на бременоста. Истото важи и за вежбањето, кое треба да е умерено и редовно. Пливањето е одличен начин за вежбање во текот на бременоста и делува терапевтски, особено во последното тримесечје. Она на што треба да се обрне внимание е температурата на водата која не смее да биде потопла од 32 Целзиусови степени. Пливањето во базен со хлорирана вода е безбедно во секоја етапа од бременоста, но треба да се внимава на темпото на пливање – да се зголемува постепено и да не се плива подолго од 30 минути. Кога се влегува во вода, треба да се влегува полека бидејќи изложувњето на големи температурни разлики може да биде опасно.
