Американските и дански научници создадоа евтин тест на крвта кој би требало да овозможи во 80 отсто од случаите да се предвиди дали постои опасност бремената жена да роди дете пред предвидениот термин.
Иако се потребни дополнителни истражувања пред да започне тестот масовно да се произведува и употребува, експертите тврдат дека има голем потенцијал кога станува збор за намалување на бројот на смртни исходи на породувања и компликации.
Во светот годишно се евидентираат дури 15 милиони предвремени породувања
Тестот, исто така, може да се користи и за проценка на терминот на породување на подеднакво сигурен и поевтин начин од ултразвучниот преглед, се наведува во извештајот објавен во стручното списание „Science“. Истражувачите ги проучувале гените поврзани со плацентата, мајчиниот имунолошки систем и црниот дроб и откриле дека девет од овие гени произведуваат РНК сигнали, кои се менуваат јасно како што напредува бременоста.
„Откривме дека поради малиот број на гени може да се заклучи кои бремени жени се изложени на ризик кога станува збор за предвремено породување“, објаснил коавторот на истражувањето Мадс Мелби, вонреден професор на Универзитетот Стенфорд и директор на „Statens Serum“ институтoт во Копенхаген.
„Поминав многу години обидувајќи се да ги разберам причините за предвремено породување. Овде зборуваме за првиот вистински и значаен напредок после долг период, кога станува збор за овој проблем“, додал Мелби.
Во истражувањето учествувал и Стивен Квејк, професор по биоинженеринг и применета физика на Универзитетот Стенфорд, поранешниот лидер на тимот, кој го создаде тест на крвта за откривање на Дауновиот синдром. Овој тест ефикасно се користи годишно од страна на повеќе од три милиони бремени жени.
За предвремено раѓање се смета секое породување кое се случува три недели пред утврдениот термин, а во САД погодува девет проценти од бремените жени, додека во светот е главна причина за смртност на децата пред нивната петта година од животот
Физиолошки, времетраењето на бременоста е 40 недели или 280 дена, сметано од првиот ден на последната менструација. Секое раѓање пред 37-гестациска недела се смета за предвремено.
Научниците се убедени дека овој тест, откако ќе е извршат дополнителни истражувања и влезе во широка употреба, ќе биде многу едноставен за употреба и финансиски достапен, што е важно бидејќи ќе се користи и во сиромашните региони на светот.
