Циметот како регулатор на високиот крвен притисок

Според студија спроведена во 2006 година во списанието „Journal of the American College of Nutrition“, циметот докажано го намалува крвниот притисок кај пациентите со дијабетес.

Хипертензијата претставува главен ризик фактор за развој на мозочен удар, срцев удар, затајување на срцето, анеуризма кај артериите и некои облици на хронично оштетување на бубрезите. Високиот крвен притисок е одговрен за просечно седум милиони смртни случаи годишно во светот. Според бројни истражувања, западниот начин на исхрана е еден од најголемите виновници за зголемениот крвен притисок. Доколку сакате да го намалите притисокот со храна, тогаш нутриционистите советуваат да се јаде доволно овошје и зеленчук, по можност свеж и во сите бои. Ако сте, пак, љубител на циметот, користете го овој зачин кој ефикасно делува на намалување на крвниот притисок.

Како делува?

Според студија спроведена во 2006 година во списанието „Journal of the American College of Nutrition“, циметот докажано го намалува крвниот притисок кај пациентите со дијабетес. Иако причината не е доволно разјаснета, се смета дека овој зачин влијае и на производството на инсулин во организмот. За таа намена се смета дека е доволно внесување на половина мала лажичка на ден.

Како се користи?

Тоа може да се направи на различни начини, но наједноставно е да се додаде во оброк. Постојат разни додатоци на исхраната со цимет, ако тоа ви е поблиска опција. Освен цимет во прав, може да користите и цимет во стапчиња, доволно е да се стави во чај за да се искористат сите негови бенефити.

Внимание!

Консумирањето цимет може да има и последици. Доколку наеднаш ја зголемите дозата што ја внесувате дневно може да дојде до појава на гингивитис, црвенила и проблеми со желудникот. Некои лица, особено оние кои пијат лекови од ацетилсалицилна киселина не треба да консумираат цимет. Доколку сте бремена пред употреба на циметот консултрајте се со гинекологот. Ако ве мачат чиреви не корстете го циметот како додаток на исхраната.