За многумина цвеклото е оној неинтересен и не баш вкусен зеленчук, во тегла која најчесто останува заборавена на дното од фрижидерот, но време е да да го смените ова! Овој црвен корен е на добар глас како супер храна која е одлична за срцето, мускулите и мозокот, а која притоа може да се приготви на разни начини. Цвеклото содржи и доста шеќери, па ќе им биде вкусно и на оние кои инаку не сакаат зеленчук, а, исто така, е одличен избор ако внимавате на линијата затоа што во 100 г има само 36 калории. Еве зошто цвеклото заслужува редовно да се најде на вашето мени:
Го намалува притисокот
Високиот притисок е еден од најчестите, сериозни здравствени проблеми во светот, па и кај нас: според податоците на СЗО, хипертензијата резултира со речиси 13 отсто смртни случаи. Цвеклото помага во оваа ситуација затоа што е богато со здрави нитрати кои во телото се претвораат во азотен моноксид, спој кој ги шири крвните садови и го намалува притисокот. Истражување спроведено пред две години покажало дека е доволно да се зема по една чаша сок од свежо цвекло или 25 дкг варено цвекло на ден во рок од само две недели и притисокот ќе падне на прифатливи вредности.
Дава енергија
Како цвеклото ги шири крвните садови кислородот допира до мускулите, што значи дека имате повеќе енергија и повеќе издржливост. Тоа е посебно важно за спортистите, но и за сите кои живеат активен живот. Напијте се сок од цвежо цвекло еден час пред одење во теретана или на трчање и ќе се уверите и самите во ова. Не е чудно што старите Римјани сакале да испијат по една чаша сок од цедено цвекло пред секс.
Ја подобрува работата на мозокот
Цвеклото ги напојува со кислород мускулите, но и мозокот, па така ги подобрува когнитивните функции или со едноставен речник – полесно и побистро ќе размислувате.
Помага при варењето
15 дкг цвекло содржи околу 3,5 г влакна и тоа главно оние кои помагаат во варењето и спречуваат запек. А добро варење и редовна столица се најдобра превенција против хемороиди, непријатна болка на нашето време која напаѓа повеќе од 50 отсто од постарите од 50 години.
Полно е со антиоксиданти
Величествената темноцрвена боја покажува дека цвеклото е полно со антиоксиданти, молекули кои играат важна улога и спречуваат многу тешки болести затоа што успешно се борат против слободните радикали. Посебно е богато со беталаини кои, како што покажале досегашните истражувања, се многу подобри во одбраната од слободните радикали отколку витаминот Ц.
Лекува анемија
Само еден филџан свежо исечкано или изрендано цвекло на ден ќе го зголеми бројот на црвени крвни зрнца во телото; цвеклото, имено, не само што изобилува со железо, туку и со витамин Ц кој помага железото полесно да го апсорбираме.
Како цвеклото да се вброи во менито
Исцедете или изблендајте го за сок заедно со морков и јаболко за да биде повкусно. Изрендајте свежо цвекло за салата во која можете да додадете целер, репка, морков. Од варено цвекло пригответе боршч, руска супа од цвекло или исечкајте го за салата во која ќе додадете капари и кисели краставички. Печете го во рерна заедно со друг коренест зеленчук, ќе имате одличен здрав ручек.
Предупредување – ако забележите дека урината ви има црвеникава боја, без паника: ТОА НЕ Е КРВ! Туку цвеклото што сте го изеле. И да, цвеклото може да ја обои и столицата
