За време на преодните сезони во годината – есен и пролет, организмот тешко се прилагодува на климатските промени. Во текот на есента, метаболизмот ја забавува работата, се до пролетта, кога се буди организмот. Во двете годишни доба, доаѓа до нарушување на сонот, исцрпеност, пад на концентрацијата, желудочни проблеми, нагли промени на телесната тежина, алергиски реакции, пад на имунитетот, замор и депресија.
Есенските денови се карактеризираат со безволност и замор, до кои доаѓа поради премалку сончева светлина, движење и престој на воздух, како и недостаток на кислород, витамини и минерали во организмот. Во есенските денови треба да јадете повеќе храна богата со антиоксиданти и витамини, што повеќе да се движите, да престојувате во природа и да се занимавате со лесна физичка активност. Со менување на исхраната и начинот на живот, можете да влијаете на симптомите на замор, предизвикан од промена на годишните времиња.
Шетајте во природа, избегнувајте да седите во кафулиња, да возите автомобил и да престојувате во простории каде што има чад од цигари. Шетајте секогаш кога ќе имате можност за тоа и почнете да вежбате – веќе од денеска
- Посветете внимание на вашиот дом. Есента е идеално време за темелно чистење на домот. Ослободете се од сите работи што повеќе не ги користите, за да ја ослободите негативната енергија од домот.
Во текот на есента слабеат одбранбените моќи на организмот, расположението е променливо, а енергетските потенцијали опаѓаат, па не е изненадување што организмот е посклон кон вирози. Потребно е некое време психата и телото да се прилагодат на климатските промени. Со која брзина организмот ќе се прилагоди на климатските промени, зависи и од менталната стабилност и состојба на организмот на самата личност.
Минувајте повеќе време надвор, бидејќи светлината го ублажува лошото расположение. Исто така, кога сте дома, немојте да седите во мрак или во темна просторија, туку запалете светло и така надитрите ја депресијата.
Боите во голема мера влијаат на психата на личноста, па затоа се препорачува во есенските месеци да носите светли, ведри бои кои ќе го подобрат вашето расположение. Топлите и ведри тонови ќе ви го вратат оптимизмот и ведрината. Избегнувајте да носите бои како кафеава, црна, сина и сива, бидејќи тие предизвикуваат лоши мисли и го забавуваат протокот на енергија.
