Инконтиненцијата е неконтролирано или неволно испуштање на урина од мочниот меур. Поради физички симптоми како ослабен мочен меур и неконтролирање течење, инконтиненцијата предизвикува загриженост, чувство на срам, па дури и социјална изолираност на лицето кое ретко сака да зборува за својот проблем. Иако стручњаците нагласуваат дека оваа тегоба би требало на време да се открие за да соодветно се третира состојбата, повеќето жени не сакаат или не знаат како да побараат помош, а кога ќе побараат тоа вообичаено е предоцна.
Податоците за оваа состојба се поразителни – инконтиненцијата во светот погаѓа околу 65 милиони жени, а во Македонија од неа страда секоја четврта жена во активните години, помеѓу 35 и 45 и е почеста појава по породувањето.
Инконтиненцијата може да се јави во распон од блага до тешка. Постојат многу методи за третман на оваа состојба, но за успех на кој било применет метод е важно трпението и упорноста на жената за менување на животните навики како: намалување на телесната тежина, вежбање, избегнување газирани напитоци и кофеин и друго.
На многу жени најнепријатна последица од инконтиненцијата им е испуштањето урина без контрола и непријатниот мирис.
Она што го советуваат лекарите е жените со овој проблем да побараат веднаш помош, бидејќи освен можните хируршки интервенции и други процедури, постојат и многу хигиенски помагала кои го намалуваат чувството на влажност и спречуваат ширење на непријатните мириси.
