Охрид, градот на УНЕСКО, изминатиот викенд, од 26 до 29 април, беше домаќин на 4. Конгрес на македонското Здружение на ортопеди и трауматолози – МАДОТ, со меѓународно учество. Прекрасните временски услови, рекордниот број на учесници и предавачи, богатата и прецизно осмислена научна програма, врвни предавања, дебати, интерактивни дискусии и симпозиуми, го одбележаа настанот во чиј фокус на интересирањето беа теми од областа на ортопедијата и трауматологијата.
Македонското друштво на ортопеди и трауматолози – МАДОТ е формирано во 1993 година, а од 1996 година е член на Европската федерација на национални друштва на ортопеди и трауматолози (ЕФОРТ)
Нови дијагностички техники, имплантни технологии, нови техники за регенерација на ткивата, програми за рехабилитација во ортопедијата и трауматологијата… – научната програма и можноста да се слушнат предавања и дискусии од најдобрите во оваа област беше навистина голем предизвик за специјалистите од земјава, кои покрај унапредувањето на своите знаења имаа и несекојдневна можност да ја прошират својата листа на контакти со колегите.
Да се дише во ист ритам, да се разменува искуство и да се дискутира за теми како дегенеративни заболувања и повреди на горен и долен екстремитет, заболувања и траума на ’рбетниот столб, детска ортопедија, спортска трауматологија и тумори на коскено-мускулен систем во прекрасна работна атмосфера… беа дел од карактеристиките на 4. Конгрес на македонското Здружение на ортопеди и трауматолози – МАДОТ, кој може да се пофали со успешна реализација, но и ветување за наредна средба в година, во уште поголем број и со уште побогата научна програма.
Фотографиите (подолу) на најубав начин ја доловуваат атмосферата на Четвртиот Конгрес на МАДОТ.
