Според истражување на американските стручњаци, утринските информативни емисии може да бидат лоши за психичкото здравје на поединци, заради количината на негативни вести.
Доколку од рано изутрина се наполниме со негативни информации кои можеме да ги следиме на различни канали, во весниците, на интернет и слично, тоа ја намалува продуктивноста на работа и не прави депресивни.
Во истражувањето кое го спровеле американските стручњаци, 110 лица кои следеле утрински вести, ги поделиле во две групи. Првата група слушала 10 минути депримирачки вести, додека другата половина три минути поминале слушајќи позитивни информации. Сите учесници по шест часа одговарале на прашања кои им биле поставувани, и се утврдило кој колку е вознемирен, под стрес, или спокоен и мирен. 
Испитаниците кои 10 минути слушале негативни информации имале 27% поголема шанса во текот на денот да бидат депримирани или под стрес, додека нивната продуктивност на работа била намалена. Иако негативните вести се чести во информативните емисии и преку ден, стручњаците не кажуваат дека не треба да се информираме, туку да го бираме времето кога ќе се изложиме на такви информации.
Научниците предлагаат наутро да одбереме позитивни вести, доколку имаме потреба веднаш да се информираме, а негативните да ги оставиме за подоцна.
