Хемоглобинот (протеин кој им дава боја на црвените крвни клетки и го разнесува кислородот од белите дробови до сите клетки во организмот) може да биде низок кај луѓе со недостаток на одредени нутриенти во исхрана, особено кај вегетаријанците и веганите, оние кои страдаат од бубрежна болест и рак, оние кои се во период на бременост и за време на менструација.
За сите овие групи на луѓе, а особено за жените, е многу важно да консумираат храна богата со железо, кое е важна компонента на хемоглобинот. Долготрајно ниското ниво на хемоглобин доведува до состојба на анемија, која се манифестира преку следниве симптоми: замор, бледило на лицето, летаргија, вртоглавица, главоболка, лупање на срцето, проблеми со концентрација, краток здив и несоница.
За да го подигнете нивото на хемоглобин и да ja зајакнете крвта, збогатете ја вашата исхрана со овошје и зеленчук, кое меѓу другото, изобилува и со витамин Ц, витамин кој ја подобрува апсорпцијата на железото во крвта
НАМИРНИЦИ ЗА СУПЕРКРВНА СЛИКА
Калинка
Спаѓа меѓу најздравите овошја во светот, изобилува со витамин Ц и железо. Со консумација на калинка ќе ја стимулирате циркулацијата на крвта и ќе ги намалите симптомите на анемија како што се замор, вртоглавица, слабост и ослабен слух. Ова суперовошје има силни антиоксидантни, антивирусни и антиканцерогени својства.
Цвекло
Сигурно веќе знаете дека цвеклото во комбинација со морков е одлично за чистење на цревата и детоксикација на телото. Но овој коренест зеленчук со интензивна црвена боја е богат извор на железо, па затоа треба почесто да го имате на трпеза ако сте подложни на анемија. Анемични лица кои јадат многу цвекло имаат помалку изразени симптоми како срцеви палпитации и чувство на студ, отколку оние кои не јадат.
Јапонско јаболко (каки)
Јапонското јаболко содржи витамин Ц и изобилува со железо, кое после калиумот е втор најзастапен минерал во неговиот состав. Токму комбинацијата на витамин Ц и железо го прави ова јаболко одлична намирница за анемични луѓе.
Семки од тиква
Со консумација на семки од тиква ќе ја засилите крвта со оглед на тоа дека содржат железо и витамин Ц. Овие семиња се одлични сојузници во борбата против рак на простата. Покрај железото, тиквата содржи и витамин Б12, кој, исто така, помага во подобрување на крвната слика.
Суво грозје
Сувото грозје содржи повеќе железо од свежото. Освен железо, содржи и витамин Ц, па затоа е одличен избор за зголемување на нивото на хемоглобин и за подобрување на крвната слика.
Суви урми
Ова егзотично овошје познато по својата исклучителна сладост содржи железо. Покрај тоа што придонесуваат за зголемување на нивото на хемоглобин во крвта, сувите урми го чуваат и здравјето на срцето. Но ако сакате да изгубите тежина, не претерувајте со нивната консумација.
Суви сливи
Бидејќи се богати со влакна, сувите сливи се вистински сојузник на доброто варење. Имајќи предвид дека содржат многу железо, тие се, исто така, одлични и за зголемување на нивото на хемоглобин во крвта. Одличен избор за анемични луѓе е и компот од сливи.
Мешунки
Леќа, грав, соја, наут и други видови мешунки може да ви помогнат да го зголемите нивото на хемоглобин и со тоа да ја спречите анемијата. Тие се одличен извор на железо за вегетаријанците и веганите. Мешунките содржат фолна киселина, магнезиум и калиум.
Извори на железо
- спанаќ
- магдонос
- сушени домати
- прокељ
- кељ
- рукола
- овесна каша
- кафеав ориз
- брокула
