Виното релаксира, пивото ја зголемува самодовербата, а вотката дава енергија – покажува истражувањето, спроведено на Универзитетот Бангор и Кралскиот колеџ во Лондон, во кое учествувале 30.000 луѓе, а кое открива како различните видови на алкохол различно влијаат врз емоциите.
Податоците се преземени од онлајн прашалникот „Global Drug Survey“, во кој учествувале лица на возраст од 18-34 години од 21 земја. Студијата покажува дека црвеното вино опушта, релаксира и луѓето кои го пијат стануваат пољубезни, но и посклони да се расплачат, додека вотката или вискито не прават поенергични, но и поагресивни. Пивото релаксира и ги прави луѓето кои го пијат посигурни.
Авторите на студијата велат: „Разбирањето на емоциите поврзани со консумирање алкохол е многу важно во решавање на проблемот на злоупотреба на алкохолот, особено поради увидот во тоа кои видови на пијалаци преферираат одредени социјални групи.“ Оваа глобална студија сугерира дека консумирањето на жестоки пијалаци предизвикува агресија повеќе отколку другите пијалаци. Со векови токму жестоките пијалаци се поврзуваат со чувствата на агресија, а најновата студија тоа го потврдува со неколку дополнителни ефекти: повеќе сме склони кон плачење, чувства на немир, но истовремено ја зголемуваат самодоверба и чувството на сексапилност и ја подигнуваат енергијата.
Еве какви емоции предизвикуваат одредени видови на алкохол:
⇒ Околу 60 отсто од испитаниците изјавиле дека по консумирање на црно вино се чувствуваат поуморни.
⇒ Повеќе од половина од испитаниците изјавиле дека црвеното вино ги опушта.
⇒ Повеќе од половина од испитаниците ги поврзале жестоките пијалаци со зголемена самодоверба и енергија.
⇒ Повеќе од 40 проценти од учесниците во студијата изјавиле дека се чувствуваат посекси по пиење жестоки пијалаци.
⇒ Половина го поврзале пивото со чувство на опуштање.
⇒ Жестоките пијалоци не прават поагресивни, понемирни, склони кон плачење или ни создаваат чувство како да сме болни…
Како што вели професорот Марк Белис од Универзитетот Бангор, резултатите се многу значајни за овој проблем. Стекнатиот став за пијалаците, исто така, игра улога – ако луѓето, на пример, пијат црвено вино за да се релаксираат, веројатно, и ќе бидат порелаксирани, а доколку пијат вотка на забава, најверојатно и самите ќе почнат да се чувствуваат полни со енергија. Покрај тоа, не треба да заборавиме ниту на различниот процент на алкохол во алкохолните пијалаци и дека луѓето со различна цел консумираат жестоки пијалаци, ако се, на пример, на вечерно излегување или се на мирна семејна вечера со чаша црно вино, велат авторите на студијата, кои објаснуваат дека е важна и улогата на рекламирањето. „Често и преку рекламите на потрошувачите им се сугерира што можат да очекуваат од одреден вид на алкохол“, додава Белис.
Научниците, секако, предупредуваат и на опасноста од прекумерна консумација на алкохолни пијалаци, што долгорочно може да предизвика голема штета.
