Прекумерната тежина директно е поврзана со депресијата, а неодамнешно истражување покажало дека вишокот килограми предизвикува два пати почесто депресија кај жените отколку кај мажите.
Научниците од Универзитетот Ексетер ги набљудувале гените на 340 000 луѓе и откриле дека оние кои имаат поголем индекс на телесна маса (BMI), кој покажува дали личноста има здрава тежина или не, повеќе патат од депресија.
На BMI скалата оние кои имале индекс 25 се со прекумерна тежина, а оние кои имаат индекс преку 30 се дебели. Секој дополнителен поен го зголемувал процентот на можности за депресија за 11 отсто кај мажите и за 23 отсто кај жените.
Доктор Џес Тајрел од Медицинскиот факултет при овој универзитет потврдила дека ова истражување покажало поврзаност меѓу дебелината и депресијата. Таа додала дека тоа е воедно и отежувачка околност затоа што луѓето тогаш немаат волја и мотивација да се посветат на слабеењето.
Она што е шокантно за Британија е дека од 1990 година бројот на дебели луѓе двојно се зголемил, додека бројот на оние кои пијат антидепресиви од 2000 години се зголемил дури за три пати.
