Без оглед на годините речиси 80 отсто од жените имаат целулит на телото. Факт е дека здравите и жените со нормална телесна тежина имаат околу 25 до 30 отсто масно ткиво, додека мажите имаат само 15 отсто. Но жените имаат подобра подлога за создавање целулит. Овој податок никако не би смеел да ве смири, туку да ве наведе да се „фрлите во акција“ и да заборавите на пасивниот живот.
Оваа естетски непријатна појава се смета за модерна или болест на 21 век, а причините за нејзината појава треба да се бараат во нашата немарност за сопственото здравје, лошите навики и недостатокот на време за водење здрав живот. Често може да се сретнеме и со твдрењето дека целулитетот е проблем од хормонска природа, како и дека естрогенот – женскиот полов хормон, е главен виновник за неговата појава затоа што тој ја задржува водата во организмот. Се смета дека стресот, брзиот живот, лошата исхрана, физичката неактивност и хормонските таблети (особено контрацептивите) имаат големо влијание на создавањето на целулитот кој можеме да го опишеме како желатинеста маса во поткожното сврзно ткиво составена од масти, токсини и вода.
Целулитот може да биде мек, обично видлив и на око, додека тврдиот е карактеристичен за личностите кои интензивно се бават со вежбање или спорт. Мекиот целулит е погрд, но полесно може да се ублажи од тврдиот кој се создава околу мускулите. Докажано е дека според својата структура и начинот на создавање не е исто што и обичното сало, туку се јавува како последица на затруеноста на организмот. Нездравата храна полна со адитиви и вештачки шеќери, недоволното движење кое ја поттикнува циркулацијата, стресот, алкохолот и пушењето ги нарушуваат виталните функции на организмот и заради тоа се создава целулитот или таканареченото „расипано сало“. Тоа е показател дека организмот ни е полн со штетни материи.
Диетите не помагаат!
Целулитот не е проблем кој се јавува само кај личностите со вишок килограми, напротив, го имаат дури и слабите личности, девојчињата, па дури и активните спортистки. Меѓутоа, неволја е што оваа „напаст“, кога еднаш ќе се појави, веќе не можеме да ја решиме. Појавата на целулитот можеме на одреден начин да ја спречиме или намалиме, но не сметајте дека со кој било метод ќе успеете засекогаш да го избришете.
Ако мислите дека ќе го „убиете“ со некоја диета, се лажете. Одбегнувајте диети затоа што тие го зголемуваат ризикот за создавање нови наслаги по телото. Најчестите места на кои се создава целулитот се бутовите, задникот, перничињата околу колената, листовите, скочните зглобови, стомакот, вратот и надлактиците. Битката против целулитот најуспешно се добива ако со нив секојдневно се фаќаме во костец. Не можеме засекогаш да го „избришеме“, но со промена на навиките ќе ја подобриме општата состојба.
Превенција
За да ја спречите појавата на целулитот мора да имате здрав однос кон своето тело, затоа воведете хигиенски навики кои ќе ви помогнат во тоа:
- На дневно ниво пијте и повеќе од 2 литра течности;
- Одбегнувајте газирани сокови, како и готови сокови кои се полни со шеќери;
- Јадете што е можно повеќе свежо овошје и зеленчук;
- Исфрлете ја од употреба конзервираната храна;
- Откажете се од сите видови чадени месни производи;
- Не јадете премногу солени јадења затоа што ја врзуваат водата во организмот место да се исфрла од него;
- Свинското или јагнешкото месо заменете ги со риба или пилешко.
Чистење на организмот
Задржувањето течности во меѓуклеточниот простор е главна причина за појава на целулит, но од сите лоши материи кои ги внесувате во организмот можете и да се ослободите. Вдишувањето чист воздух многу ќе значи за прочистување на дишните патишта, а најсигурен начин за ослободување на токсините од телото е исфрлање преку уринарниот тракт. Затоа е важно да пиете што е можно повеќе вода и чаеви. Затоа во секојдневието обавезно воведете:
- Колку можете повеќе прошетки на чист воздух, во природа, при што можете да дишете длабоко;
- Потење, без разлика дали се потите заради домашни или спортски или некои други активности;
- Чаеви од петелки од цреши, свила од пченка, магдонос или зелен чај;
- Сокот од свеж ананас се смета за добар согорувач на масното ткиво;
- Во исхраната обавезно внесете суви сливи, пченични никулци и трици.
Битката со целулитот најуспешно се добива ако со него секојдневно се фаќате во костец. Не можеме засекогаш да го отстраниме, но со промена на навиките може да се подобри ситуацијата.
Масажа
Целулитот се наоѓа на длабочина од 3 до 5 милиметри под површинскиот слој кожа. За да се дојде до него најдобар метод е масажата со која ќе се разбијат таканаречените капсули во кои е сместен. Со масажата ќе се стимулираат крвната и лимфната циркулација и така ќе се овозможи ослободување на целулитот од „капсулите“. Масирањето на тие делови од телото не смее да биде грубо, туку со лесни движења треба да се разбиваат наслагите. Најдобро е деловите да се масираат од периферијата кон срцето, односно треба да се почитува природното движење на крвта во венскиот систем, а се препорачува прво да се масира горниот дел од ногата, бутовите, па колената и листовите.
Какви последици остава целулитот?
Наслагите целулит се причина заради која се менува женската фигура, а тоа посебно се однесува на колковите и задникот, односно на деловите од телото на кои е најслаба циркулација.
- Проширените вени меѓудругото се последица на појавата на целулитот затоа што е отежната циркулацијата;
- Отекување на нозете, исто така, може да се јави заради целулитот затоа што тој врши притисок на лимфата и вените;
- Пукањето на капиларите, исто така, е последица на оваа појава и најчесто се јавува на кожата, под зоната на која се насобрале најголеми наслаги целулит.
