Колку часови ноќен сон, во каква положба спиеме и кога одиме во кревет, се често теми со кои се занимаваат експертите, но, исто така, се и предмет на истражувања.
-
Иако препораките за седум до осум часа ноќен сон се докажани и потврдени со истражувања, научниците велат дека особено е битно на спиење да заминуваме секогаш во исто време.
Конкретно, ова се заклучоци од истражувањето спроведено на Универзитетот Дјук, а чии резултати се објавени во списанието „Scientific Reports“. Во заклучоците се наведува дека иако поголемиот дел од родителите ги тераат децата на своја рутина, односно да заминуваат на спиење секогаш во исто време, како што растеме, така некаде попатно ја губиме оваа навика и немаме ред во легнувањето навечер. Како последица на тоа, кај луѓето со неправилен сон е забележано повисоко ниво на шеќер во крвта и покачен притисок.
Истражувачите тврдат дека не е познато дали овие симптоми предизвикуваат неправилен сон или неправилниот сон ги предизвикува споменатите тегоби.
Истражувањето опфатило 1978 лица на возраст меѓу 54 и 93 години, кои имале проблeм со обезбедување седум часа квалитетен ноќен сон. Истражувачите ги следеле нивните навики за спиење и го забележувале времето кога заминуваат на спиење, точно во минута, за да може да ги следат промените кои се случуваат во организмот. На пример, има ли промена доколку лицето кое обично оди на спиење во 22 часот, тоа го направи десетина минути подоцна.
Било забележано дека лицата со хипертензија спијат подолго, а лицата со вишок килограми стануваат подоцна. Сепак, најважниот заклучок на ова истражување е дека следењето на сонот е добар метод за предвидување на ризикот од срцеви заболувања и проблеми со дигестивниот систем.
Имено, лицата со неправилни навики за спиење се поподложни на депресија и стрес, што се предизвикувачи токму на срцевите заболувања.
