Многу луѓе сакаат додека трчаат да слушаат музика или едноставно на некоја од апликациите за таа намена да проверуваат колку калории потрошиле, но всушност така прават огромна грешка. Оваа навика може негативно да се одрази на резултатите, но и телото.
Имено, просечниот паметен телефон тежи околу 200 грама и иако можеби тоа не ви се чини како голема тежина, всушност и најмалата нерамнотежа во распределбата на тежината додека трчате може да има влијание. Кога трчате, целта е да одржите доследен ритам, но кога имате нешто во рака (мобилен, шише вода, клучеви или нешто трето), тоа предизвикува асиметрија во држењето на телото, а со тоа и на движењето при трчање зата што телото се однесува поинаку од кога не држите ништо.
Телото ќе се обидува за сето време да ја надомести тежината на спротивната страна од онаа каде натежнува телефонот, што дополнително ги оптоварува мускулите. Тоа може да доведе до напрегање и повреди, особено на рамената, колковите и колената. Исто така, ако го држите телефонот во рака, тоа ви го одзема вниманието и фокусот од трчањето.
Решение?
Оставете ги сите одвишни предмети дома или во автомобилот. Ако веќе морате да носите клучеви или пари со вас, тогаш носете ги во торбичка или појас на кој може да се закачи телефонот.
