Џемперите, јакните, капите и ракавиците се задолжителен дел од зимската облека, но освен што со користење на различна облека може да се загреете од надвор – температурата на телото може да се покачи и со одредени видови на храна. Доколку го послушате својот организам, ќе забележите дека ви се намалува апетитот за лесните и ладните, таканаречени диетални јадења, а ви се зголемува апетит за јака, зачинета, солена и лута храна. Освен тоа, постојат и прехранбени производи на чија употреба обично забораваме, па еве можност да се потсетиме која храна е корисна во овој период од годината.
Јадете елда – што е можно почесто!
Многу малку од нашето население го користи овој лековит и хранлив производ, кој често се вбројува во групата на житарки, иако е дел од семејството на зелен лиснат зеленчук. Освен што го загрева телото, елдата е богата со витамини од групата Б и витамин П, кој ги штити крвните садови. Елдата помага во лекување на заболувања на крвотокот, проширени вени, испукани капилари, но и многу други заболувања и тегоби. Од неа може да се направат прилози за главни јадења, каши, чорби, колачи, а од нејзиното брашно лебови, пити и други пецива.
Грицкајте бадеми
Ова јаткасто овошје е многу здраво, содржи масти кои се корисни за нашиот организам и прилично е калорично, а благодарение на тоа влијае и на покачување на телесната температура. И магнезиумот, со кој изобилуваат бадемите, го поттикнува загревањето бидејќи ја подобрува циркулацијата. Сувите кајсии, смокви, грозје и сливи спаѓаат во висококалорична храна, па како такви се препорачуваат за зимските месеци бидејќи обезбедуваат дополнителна енергија во борбата со студот. Со оглед на тоа што овој извор на енергија многу брзо стигнува во крвотокот, особено се препорачува на спортистите по напорен тренинг.
Интегрални житарки
Интегрален ориз, овес, просо и ‘рж се житарки кои изобилуваат со енергија и протеини, па со самото тоа помагаат во зголемување на телесната температура. Стручњаците особено го истекнуваат значењето на овесот, бидејќи тој спаѓа во житарки најбогати со липиди, состојки кои ја зголемуваат отпорноста на студ бидејќи лесно се претвораат во енергија. Најдобро е житарките да ги користите за појадок, како погонско гориво кое ќе ве грее во текот на денот и ќе ви даде многу енергија и добро расположение. Освен тоа биберот, лутата пиперка, ренот, кромидот и лукот, ѓумбирот и сенфот се вистински зимски зачини бидејќи ја забрзуваат циркулацијата и се борат против студот.
Пијте зелен чај
Содржи кофеин и катехин, две супстанци кои имаат улога на природни “грејачи”, а корисен е и за зајакнување на имунитетот, па затоа се препорачуваат една до две шолји од овој чај во текот на денот.
