Да се натераат мажите да одат на лекар е многу тешко. Многу истражувања направени досега потврдуваат дека многу е мал процентот на мажи кои одлучуваат да појдат на доктор за да го проверат своето здравје. Мажите помалку се грижат за себе, многу ретко го контролираат своето здравје, помалку бараат лекарски совети, и недоволно ги користат советите за самопомош. Типичен маж во средни години не оди на лекар, а во аптека оди по топломер или евнтуално за лек против болки.
Но, иако мажите живеат подолго од порано, сепак жените се подолговечни во сите земји во светот, освен во Сомалија, а морталитетот на мажите е поголем во однос на жените во речиси сите споредувани главни причинители за смртност. Не постои генетска предиспозиција за рана смрт кај мажите, па по се изгледа мажите многу повеќе посегаат по лошите животни навики (пушење, алкохол, прејадување, недоволна физичка активност).
Вредноста и квалитетот на секој превентивен преглед се состои во тоа да ги дијагностицира болестите навреме, како и да понуди препораки за промена на животниот стил, навиките, начинот на исхрана и да посочи патеки за поуспешно следење на здравјето.
- Мерење на крвниот притисок барем еднаш годишно, што може да го направите кај својот матичен лекар или во најблиската аптека;
- Комплетна крвна слика со биохемиски анализи, како и преглед на урината. Тоа се едноставни тестови кои зборуваат многу за вашето моментално здравје. Направете го барем еднаш во годината (глукоза, креатинин, билирубин, уреа, црп, алт, аст, калиум, натриум, вкупен холестерол, хдл холестерол, триглицериди, урина);
- Преглед на очи (очен притисок, преглед на очното дно);
- ЕКГ – барем еднаш на три години, ако немате никакви тегоби;
- Ултразвук на абдомен;
- Одредување на ПСА во крвта по 45-та. Ако имате тешкотии при мокрењето направете го веднаш;
- Тест за окултно крварење во столицата;
- Колоноскопија;
- Појдете на лекар при секое позабележително дебелеење, рани кои не заздравуваат, промени во бенките или неприродно крварење;
- Лекарска помош побарајте и при секое долготрајно кашлање, засипнатост, промени во столицата или во мокрењето, како и при нагло губење на килограми.
