Веќе подолго време постои мислење дека стресот допринесува во напредувањето на карциномот, а сега швајцарски научници од Универзитетот во Базел, откриле молекуларни механизми кои ги поврзуваат метастазите на ракот на дојка со зголеменото ниво на хормоните на стресот. Освен тоа, откриле дека синтетските деривати на хормоните на стрес, кои често се користат како противвоспалително средство во терапијата на ракот, го намалуваат ефектот на хемотерапијата.
Инаку, една од главните препреки во лекувањето на метастатскиот рак на дојка е феноменот на туморна хетерогеност. Имено, како болеста напредува, туморот станува се поразновиден, а разликата помеѓу клетките на ракот може да доведат до несоодветно лекување.
Исто така, откриено е дека метастазите на ракот на дојка имаат зголемена активност на глукокортикоидните рецептори (GR) кои посредуваат во ефектите на хормонот на стресот како што е коризолот. Воочено е дека нивото на хормоните на стресот кортизол и кортикостерон, биле повисоки при присуството на метастази.
Се смета дека зголемените нивоа на овие хормони на стресот ги активираат глукокортикоидните рецептори (GR), што предизвикува зголемена колонизација и хетерогеност на клетките на ракот и на крајот, намалување на стапката на преживување.
