Познато е дека доењето е добро и за здравјето на детето и за здравјето на мајката. Резултатите од новата студија во која учествувале повеќе од 80 000 жени покажале дека доењето може да го намали ризикот од развој на мозочен удар кај мајките подоцна во животот. Имено, жените кои доеле имале 23 % помал ризик од мозочен удар после менопаузата. Исто така, колку подолго доела една жена, толку бил помал нејзиниот ризик од мозочен удар.
Според мислењето на експертите, доењето е еден од многуте фактори кои би можеле да помогнат во заштита од мозочен удар
Мозочниот удар е четврта водечка причина за смрт кај Американците на возраст од 65 и повеќе години.
Препораките за превенција на мозочниот удар вклучуваат здрава исхрана, одржување на здрава телесна тежина, редовно вежбање, непушење, ограничување на внесувањето на алкохол и контрола на хронични медицински состојби, како што се висок крвен притисок и дијабетес, пишува „Journal of the American Heart Association“.
Покрај намалување на ризикот од мозочен удар кај мајките подоцна во животот, предностите од доењето врз здравјето на мајката се бројни. Намалено крвавење по раѓањето, побрза инволуција на матката, побрзо враќање на старата телесната тежина, намален ризик од карцином на дојка и јајници, намален ризик од остеопороза подоцна во животот…
Светската здравствена организација (СЗО) препорачува ексклузивно доење во текот на првите шест месеци од животот на бебето, како и продолжување со доењето до неговата втора година.
