Параназалните синуси се шуплини во коските на главата кои се појавиле поради исправувањето на човекот во текот на еволуцијата и неговото исправено одење. Тие шуплини се исполнети со воздух и се обложени со респираторна слузница, иста како во носот и во белите дробови.
ПОСТОЈАТ 4 ГРУПИ НА СИНУСИ:
- Максиларни (вилични);
- Фронтални (челни);
- Етмоидални (над носот и меѓу очите);
- Сфеноидални (зад носот во центарот на главата).
Синусите поради обложеноста со респираторна слузница главно имаат респираторна функција. Содржината на синусите низ нивните отвори се исцедува и дренира кон надвор или кон грлото и ждрелото.
НАЈЧЕСТИ СИМПТОМИ
Воспалението на синуси означува воспаление и отекување на синусната слузница и може да биде бактериско, вирусно и габично. Најчести симптоми се притисок во главата и главоболка, обилен исцедок од носот и зад носот, кај посилните воспаленија се јавува и зголемена температура. Доколку има и гноен секрет тоа говори дека можеби станува збор за бактериско воспаление. Исцедок од носот во кој има крв, исто така, зборува за воспаление и треба детално да се прегледа целата носна шуплина.
Често поради хипереактивност на носната слузница на надворешни дразби, како алергии, промени на температурата доаѓа со симптоми слични на класичните воспаленија (главоболка и притисок). Тоа не значи нужно дека состојбата е инфективна, туку дека дошло до отекување на слузницата со запушување на изводните канали од синусите кон носот. Тоа се најчести тегоби со синусите и често се заменуваат со класичните воспаленија и неоправдано се лекуваат со антибиотици.
Секој човек има некои карактеристики да биде чувствителен на некои делови на телото на разни болести. Кај проблемите со синусите постои склоност слузницата на носот да отекува, со тоа се запушуваат отворите на синусите и продуцираната слуз се насобира во синусите. Ако се намножат бактерии кои ги има постојано во нашиот систем за дишење, може да дојде до бактериско воспаление, а ако е појавена инфекција со вируси, симптомите се слични.
Секогаш целта на терапијата на воспалените синуси е тие да се исцедат, да нема воспалителен секрет во синусните шуплини и уредно да биде одржано дишењето низ нос.
