За многу жени стриите се спомен на бременоста, малку се оние кои станале мајки без траги, односно без стрии. Но иако најчесто се јавуваат во бременоста, таа всушност не ги предизвикува стриите, бременоста е само „прекинувач“ за појава на овие кожни промени.
Стриите едноставно кажано се создаваат кога кожата нагло и многу ќе се рашири, за време на бременоста да речеме или кога личноста нагло многу ќе се здебели. Или кога ќе почне да работи на мускулите, а ова всушност значи дека и мажите може да се соочат со оваа непријатна појава – поретко во споредба со жените, но се случува и кај нив. Може да се појават и кај тинејџерите кои нагло израснуваат, кај личностите кои земаат стероиди, после операција за зголемување на градите, оние кои имаат тенка кожа, генетски предиспозиции или хормонски проблеми…
Овие промени настануваат кога кожата се растегнува побрзо од што телото може да произведе се што е потребно за да се изгради нормална и мазна кожа. Научниците сега се позабавиле со овој феномен и одговорот на прашањето зошто некои луѓе се посклони на појава на стрии се крие во нашите гени. Со проучување на базата на ДНК која содржи примероци од 760 000 личности, утврдиле дека постојат дури 544 генетички „маркери“ кои се поврзани со стриите, пренесува „Дејли меил“.
За жал, кога еднаш ќе се појават не можете многу да сторите. А не можете да сторите ништо ниту за да ја спречите појавата на стриите.
Што е со кремите… Повеќето производи кои можете да ги купите без рецепт само ќе ја хидрираат кожата. Некои повеќе, некои помалку, но хидратацијата е се што можете да очекувате.
Од друга страна, има луѓе кои мислат дека кремите помагаат, но оние кои тврдат дека одредена крема им помогнала стриите да станат помалку видливи не се ни свесни за фактот дека после некое време стриите всушност сами избледуваат и „се собираат“, така станувајќи помалку видливи. И тоа е природен процес кој нема баш многу врска со тоа што ќе нанесете на кожата. Затоа ако имате стрии најдете начин да ги „заскате“ или едноставно да ги толерирате. Во секој случај ако се тука не се оптоварувајте со нив, бидејќи ама баш ништо не кажуваат за вас и колку вредите како личност.
