Неодамнешна студија укажала на важната улога на антоцијанинот (антиоксиданти со кои изобилува зрнестото и јагодестото овошје) во превенцијата од карцином, како и во развојот на потенцијалниот третман за оваа болест.
Претходни истражувања покажале дека овие антиоксиданти помагаат и во превенцијата на срцеви заболувања, дијабетес, дебелина и невродегенеративни заболувања.
Антоцијанините претставуваат природни пигменти кои се заслужни за црвената, виолетовата и сината боја на многу видови овошје, зеленчук и цвеќе. Овие соединенија ја зголемуваат активноста на ензимот сиртуин 6 (SIRT6), кој го намалува растот и развојот на канцерогените клетки. SIRT6 е важен за метаболизмот и долговечноста, учествува во процесот на репарација на ДНК и го редуцира инфламаторниот одговор. Активноста на ензимот SIRT6 во најголема мера го зголемува антиоксидантот цијанидин, со кој особено изобилуваат малините, брусницата и дивите боровинки.
