Луѓето со прекумерна телесна тежина кои консумираат бадеми и чоколадо секој ден може да имаат понизок холестерол од други прекумерно тешки луѓе кои не јадат ваков тип на храна, покажа едно неодамнешно испитување.
Консумирани одделно, бадемите и чоколадото, веќе се третирани во многу поранешни истражувања во кои беа поврзувани со понизок шеќер во крвта, понизок крвен притисок, понизок холестерол и помало чувство на глад – сите фактори на ризик за срцеви заболувања.
За целите на последното истражување научниците го мереле нивото на холестерол кај 31 човек со прекумерна тежина. Во текот на првите четири недели од истражувањето, сите биле на стандардна американска исхрана и сите секој ден јаделе по речиси една третина шолја полна со бадеми. Во следните четири недели, испитаниците додале речиси една четвртина шолја коцки темно чоколадо дневно во исхраната и околу 2,5 супени лажици какао во прав. Сите испитаници, исто така, имале и период од четири недели во кој во диетата додале и бадеми и темно чоколадо.
Резултатите покажале дека додавањето (само) на бадеми го намалило за седум проценти нивото на лошиот ЛДЛ холестерол, кој е одговорен за создавање на наслаги на ѕидот на крвните садови. Комбинацијата на бадеми и чоколадо, исто така, го намалило нивото на ЛДЛ холестерол, според резултатите објавени во магазинот „Journal of American Heart Association“.
„Бадемот сам по себе го намали нивото на ЛДЛ холестеролот, за разлика од чоколадото, кое пак не го зголеми нивото на ЛДЛ холестеролот“, истакна Пени Крис-Етертон, водич на истражувањето и нутриционист од Универзитетот „Penn State“.
Резултатите сепак не значат дека е паметно луѓето да почнат да јадат бадеми и чоколадо во неограничени количини. Бадемите и чоколадото може да се јадат во умерени количини наместо други слатки, а не како додаток на колачи, слатки и десерти.
Учесниците во истражувањето имале помеѓу 30 и 70 години.
