Задишувањето треба да се разгледува во комбинација со факторите како возраста, семејните заболувања, спортските навики, телесната тежина. Околу 15 % од населението во Европа се жали на зачестено задишување и недостиг на воздух.
Пред 40-годишна возраст
Недостаток на физичка активност
Лица на возраст до 40 години се задишуваат ако немаат навика да спортуваат или да се движат доволно, но истото важи и за оние кои до пред извесно време биле спортисти кои се откажале од тренинзи и напор. При секоја физичка активност, колку и да е незначителна, срцевиот ритам се забрзува, а крвниот притисок се зголемува за да достави максимално количество кислород на мускулите. При недостиг на движење, телото не е подготвено за напорот, мускулите се одвикнале да се опуштаат за да можат да го прифатат зголемениот проток на крв. Тоа се компензира со повисок крвен притисок и за забрзан пулс.
Решение: Движењето е универзален рецепт кај огромен број на здравствени проблеми, вклучувајќи го и задишувањето. Се препорачуваат сеанси од 20 минути непрекината активност, два пати неделно. Телото може да се тренира постепено, додека активноста не стане навика. Од медицинска гледна точка треба да се направи испитување на реакциите на организмот при физички напор пред да почнете со спорт или друга поголема физичка активност.
При најлесен напор
Виновни се килограмите
Колку повеќе вишок килограми имате, толку обрзо се јавува задишувањето. Поголемата телесна тежина го оптоварува мускулите и срцето за кои е потребно зголемено количество на кислород. Освен тоа, масното ткиво е снабдено со крвни садови, кои одземаат од крвниот проток насочен кон мускулите. Промената во дишењето се забележува кога тежината се зголемува за 3-4 килограми. Но, станува многу повпечатливо кога ќе се здебелите 6-7 кг.
Решение: Комбинирањето на балансирана исхрана со редовна физичка активност доведува до нормализација на телесната тежина и задишувањето исчезнува.
Во мирувачка положба
Кардиоваскуларни болести
Типични знаци на кардиоваскуларни заболувања се задишувањето во мирување и почесто навечер, потреба за повисока перница и од длабоко вдишување. Други симптоми вклучуваат болка и стегање во градите, забрзан срцев ритам. Бројни кардиоваскуларни заболувања можат да се изразат преку отежнатото дишење – миокарден инфаркт, абнормално проширување на срцевиот мускул, дисфункција на срцевите залистоци, аритмија или хипертензија. Повеќето од нив се јавуваат околу и по 60-годишна возраст, но некои аномалии на залистоците постојат уште од пубертетот.
Решение: Консултирајте се со кардиолог. Тој ќе провери дали имате проблеми со срцевите валвули и ќе го измери крвниот притисок. Ехото на срце овозможува да се процени како функционираат срцевиот мускул и залистоците и каква е внатрешната состојба. Крвните анализи даваат дополнителни индикации за срцева слабост. По поставување на дијагнозата се препорачува соодветно лекување.
Во комбинација со главоболка и замор
Анемија
Задишувањето може да е сигнал за анемија, односно за недостиг на црвените крвни клетки. Хемоглобинот, кој се содржи во нив, обезбедува кислород до сите органи во телото. Анемијата може да се должи на крварење во дигестивниот систем или во репродуктивните органи. Главната причина за болеста е недостигот на железо – елемент без кој производството на црвени крвни клетки е невозможно. Железото во организмот е недоволно при обилен менструален циклус, чир на желудникот, малигни или бенигни тумори во цревата, леукемија.
Решение: Консултација со лекар. При анемија задишувањето е придружено со бледило на лицето, замор, срцебиење, вртоглавица, зуење во ушите, светки пред очите. Ако ги немате овие симптоми крвниот тест може да ја потврди или отфрли хипотезата за анемија, како и да утврди за кој тип на анемија станува збор.
Се појавува одеднаш
Астма или алергија
Кај младите луѓе на возраст од 14 до 40 години, задишувањето најчесто зборува за астма. Алергиите стануваат се почести, на пример, од алергиски ринит страдаат над 20 % од Европејците.
Решение: Матичниот лекар и пулмолог врз база на клинички преглед и тестови ќе утврдат дали причината е навистина е алергија или астма. Задишувањето или тешкото дишење, исто така, може да се должи на пушењето, загадената средина, стресот, гласното смеење, менструалниот циклус и др.
