Хранете се здраво
За да го зачувате видот добар и во зрели години почнете да водите сметка за себе на време. Витамините А, Ц и Е и минералите цинк и бакар се од пресудна важност за добриот вид. Антиоксидантите, вклучително и бета каротенот и лутеинот, ја штитат макулата од оштетувањата кои може да ги предизвика сонцето. Што треба да јадете? Темнозелен листест зеленчук, жолчки од јајца, жолти пиперки, тиква, морков.
Научните истражувања покажале дека консумирањето зеленчук со жолта боја спречува оштетувања на макулата предизвикана со стареење. Намирниците богати со сулфур, цистеин и лецитин штитат од катаракта. Одличен избор се и лукот и кромидот, копарот и власецот. Во исхраната би требало да вклучите и боровинки, лосос, скуша, бакалар и сардини, бидејќи содржат незаситени масни киселини кои, меѓудругото, се добри и за очите.
Вежбајте ги очите
Овие едноставни вежби ќе ви помогнат да ги зачувате очите и видот во добра состојба. Би требало да ги правите наутро и навечер, но и во текот на денот, кога ќе почувствувате замор на очите. Ако вежбате секој ден, подобрување ќе почувствувате веќе после еден месец.
„Загрејте“ ги очите. Загрејте ги дланките триејќи ги една од друга, а потоа полека држете ги преку очите пет секунди. Повторете ја постапката три пати.
„Вртете“ со очите. Почнете гледајќи нагоре, а потоа полека кружете со погледот десет пати во насока на движење на стреклите на часовникот и десет пати во спротивна насока.
Вежбајте го фокусот. Земете молив/пенкало, испружете ја раката и фокусирајте го погледот. Потоа полека придвижувајте го моливот кон лицето одржувајќи го фокусот, а потоа вратете го во првобитната положба. Повторете го ова десет пати.
Масирајте го подрачјето околу очите. Со кружни движења на палците масирајте ги слепоочниците. Направете 20 движења во едната и 20 во другата насока. Истото повторете го и над веѓите, а потоа и кон коренот на носот.
Одморете се. Зафрлете ја главата, затворете ги очите и одморете три минути. Обидете се да ја намалите изложеноста на негативните влијанија од надворешната средина.
Одбегнувајте агресивно, пресилно светло. Ако работите на компјутер на секои половина час правете по 5 минути пауза, одбегнувајте зачадени простории, носете очила за сонце и можеби најважното – не ги чепкајте очите со валкани раце.
