Министерство за здравство на Хрватска ги предупредува граѓаните дека зрачењето од мобилните телефони може да има влијание врз здравјето на луѓето. На вебстраницата на Министерството од неодамна е објавена едукативна брошура и видео, во кои се вели дека изложеноста на корисникот на високофрекфентни електромагнетни полиња на мобилните телефони значително се намалува со зголемување на одалеченоста на мобилниот телефон, односно расте со негово приближување, и дава совети кои помагаат да се избегне ризикот.
Вклучете го звучникот или ставете слушалки и одбегнувајте долго држење на телефонот покрај телото или увото
Советите се универзални, па затоа ви пренесуваме дел од нив. Имено, мобилниот уред емитува најмногу електромагнетни полиња за време на воспоставување повик или трансфер на податоци, па добро е да се причека додека се воспостави повик пред да го ставите до увото, бидејќи за време на поврзувањето мобилниот уред работи со максимална моќност.
Во препораките до своите граѓани, Министерството им препорачува на корисниците на мобилни телефони да испраќаат текстуални пораки (СМС, мејл, чет…) секогаш кога можат, наместо да се јавуваат на мобилниот телефон, и додава дека е добро да се носи уредот што подалеку од телото, односно во ташна или ранец наместо во џебот на панталоните или кошулата.
Граѓаните треба да избегнуваат да спијат во близина на мобилен уред. „Додека спиете, не го ставајте мобилниот уред под перница или на ноќната масичка“. Изложеноста на зрачењето се намалува дури за 10.000 пати ако се зголеми одалеченоста од мобилниот телефон.
Избегнувајте долготрајно држење на мобилниот телефон на телото или увото
Вклучете го звучникот или ставете слушалки и одбегнувајте долго држење на телефонот покрај телото или увото. Поврзете се на безжичен интернет (Wi-Fi), затоа што тогаш мобилниот телефон работи со помала сила, се истакнува во превентивните препораки, кадешто и се советуваат граѓаните да го скратат времето поминато во разговор на мобилниот уред.
