Истражувања покажуваат дека осаменоста е многу раширено чувство меѓу луѓето, кое се објаснува како општествена болка што нè охрабрува да бараме комуникација со други луѓе. Ако во подолг период не ја задоволиме нашата природна потреба за контакт со луѓе, почнуваме да се чувствуваме празно, изолирани, оддалечени од другите и осамени.
Чувството на осаменост го зголемува нивото на хормоните на стресот и крвниот притисок. Така, регулацијата на васкуларниот систем е нарушена и срцето работи со тешкотија.
Заради тоа е многу важно да научите како да се справите со чувството на осаменост. Експертите нудат неколку стратегии …
Променете ја рутината- излезете од дома
Ако долго време ве мачи осаменост, а и не сакате да се дружите со луѓе, тоа е сосема нормално, вели Sari Chait, клинички психолог, додавајќи дека тоа е маѓепсан круг што само ќе го зајакнува чувството на осаменост. За да го прекинете, организирајте средба со пријатели, одете во библиотека или читална каде што секогаш има многу луѓе, или одете во парк. Менувањето на рутината ќе ве изнесе од куќата. Ако, пак, изберете хоби што ве прави среќни, шансите да запознаете нови пријатели и да ја надминете осаменоста се огромни.
Пронајдете време во денот само за вас и партнерот
Осаменоста во врските и во браковите не е невообичаена работа. Дури 28 проценти од луѓето кои рекле дека не се задоволни од нивните односи велат дека се чувствуваат осамени. Луѓето можат да се чувствуваат осамено и во врските, бидејќи не ги задоволуваат нивните основни потреби, вели психологот Sari Chait. Ова не значи дека врската е лоша, но ако се чувствувате осамено, би било добро да одделите секој ден барем еден час за себе и вашиот партнер, време во кое ќе разговарате или ќе договорите заеднички активности.
Волонтирајте
Со мерење на хормоните и активноста на мозокот, истражувачите откриле дека активностите кога им помагаме на другите, ни помагаат и нам, бидејќи тоа чувство ни дава неспоредливо задоволство. Волонтирањето ќе ви овозможи да бидете корисни, да се опкружите со луѓе и да го проширите кругот на познаници.
Побарајте стручна помош
Кога се чувствувате осамено, кога контактите со другите луѓе не се доволни и не ве исполнуваат пожелно е да се побара стручна помош од терапевт. Лекарот лесно ќе може да одговори на вашите прашања што е тоа што ве ограничува да постигнете блискост и задоволителни односи со другите луѓе. Тоа е чекор кон надминување на чувството на осаменост и пат кон исполнет живот.
