Хемороидите се генерално безопасни, но аналното ткиво понекогаш може да сврби и да биде болно. Причината за оваа состојба е абдоминалниот притисок предизвикан од запек, прекумерни масни наслаги во абдоменот, бременост, па и трчање на подолги патеки. Постои можност притисокот да предизвика растегнување на ткивото, придонесувајќи крвните садови во хемороите да отечат, па и да почнат да крвават. Низ оваа телесна промена минува речиси 50 проценти од населението барем еднаш во животот.
Внатрешни и надворешни хемороиди
Постојат внатрешни и надворешни хемороиди. Надворешните се наоѓаат на почетокот на аналниот отвор и се покриени со кожа, поради што имаат нерви. Поради нивната поврзаност со нервниот систем, тие најчесто чешаат, печат и предизвикуваат болка. Внатрешните хемороиди се наоѓаат на внатрешната страна на аналниот канал и не се прекриени со кожа, па невозможно е да се почувствуваат. Но поверојатно е дека внатрешните хемороиди ќе крварат, а ако ситуацијата стане акутна, може и да испаднат.
Безопасни по здравјето
Иако крварењето и болките звучат страшно, хемороидите не се опасни по здравјето и не предизвикуваат карцином. Единствен проблем е обилното крвавење кое може да доведе до анемија.
Посета на лекар
Во случај на хроничен свраб и крварење, мора итно да се јавите на доктор. Иако во таква ситуација повеќето се сомневаат на хемороиди, добро е да се направат дополнителни тестови за да се исклучи нешто поопасно.
Промена на навиката за вршење нужда
Денес е вообичаено да се седи на веце-школката и откако ќе се изврши нуждата. Виновници за тоа се мобилните телефони кои го земаат вниманието и играњето на мобилен телефон го замени читањето весници. За време на седењето се врши притисок врз аналниот канал, па крвта се слева во хемороите при што тие отекуваат. Отечените хемороиди стануваат проблем за сопственикот.
Најновата студија открила дека дури 57 отсто од луѓето со себе во тоалет го носат мобилниот телефон кој директно може да влијае на појавата на хемороиди. Иако многумина носењето на мобилниот во тоалет го оправдуваат со потребата за мултитаскинг, докторите предупредуваат дека оваа лоша навика може да ни направи поголема штета, од што може да биде корисна.
Мобилниот телефон во тоалетот може да биде причина за појава на хемороиди затоа што седењето во тоалет со телефон во рацете трае многу подолго, па притисокот на вените околу анусот е многу поголем ако, на пример, во тоалет се задржите само онолку колку што е потребно за вршење нужда. Во прашање е времето кое го поминувате во положба на седење на тоалетната школка што го зголемува ризикот од развивање хемороиди.
Точниот број на луѓе кои патат од хемороиди не се знае, затоа што голем број луѓе патат во тишина. Оваа болест за многумина е табу тема за која не зборуваат, а грешат бидејќи состојбата може да се држи под контрола.
Место да пребарувате по апликациите додека обавувате нужда, во секојдневната исхрана внесете житарки, многу течности, вежбајте секојдневно и оставете го мобилниот настрана.
Опстипација
Притисокот на цревата за време на запек е една од главните причини за воспаление на хемороидите. За да се спречи запекот и надуеноста треба да пиете многу вода и да ја промените исхраната.
Лекување
Постојат многу креми и масла кои го спречуваат воспалението на хемороидите. Дел од нив се на билна основа, како масло од кантарион, масло од невен, екстракт од див костен, ајдучка трева и други. Исто така, топлата купка го смирува надразнетото подрачје и отеченоста се повлекува. Ако ситуацијата стане хронична тогаш се врши хируршко отстранување на критичното ткиво.
Лута храна
Теоријата дека лутата храна предизвикува воспаление на хемороидите е сосема неточна. По внесување на храната во телото или после нужда може да почувствувате чешање, но тоа не е поврзано со хемороидите. Она што се случува во аналниот канал е еднакво на она што го чувствувате во усната празнина откако ќе изедете лути пиперки.
