Светската здравствена организација (СЗО) вчера вечер издаде привремени препораки за користење на вакцините против КОВИД-19 од различни производители за втора доза и за бустер доза.
Во зависност од достапноста, мРНА вакцините, како оние што ги развија Фајзер и Модерна, може да се користат како дополнителни дози по почетните дози векторски вакцини, како АстраЗенека и обратно, информираше СЗО.
АстраЗенека и било која мРНА вакцина може исто така да се користат по првичната доза на инактивирана вакцина, како Синофарм, велат од СЗО.
Вирусните векторски вакцини содржат упатства за созвадање антигени на коронавирусот, додека МРНА вакцините користат код од SARS-CoV-2, коронавирус што предизвикува КОВИД-19 за да предизвикаат имунолошки одговор кај примателот. За инактивираните вакцини се зема вирус SARS-CoV-2, кој се умртвува или убива со помош на хемикалии, топлина или радијација.
Насоките се донесени врз основа на советите на Стратешката советодавна група на експрети при СЗО за вакцини, претходно овој месец.
Препораката доаѓа откако минатонеделното големо истражување покажа дека првата доза вакцина АстраЗенека или Фајзер, како и втора доза вакцина Модерна, девет недели подоцна создаваат подобар имунолошки одговор.
Меѓутоа, СЗО вели дека за мешањето треба да се земе предвид достапноста, како и придобивките и ризиците од користењето вакцини против КОВИД-19.
Препораките ќе се преиспитаат во моментот кога ќе бидат достапни повеќе податоци, велат од СЗО.
Многу земји веќе почнаа со мешањето на вакцини поради тоа што се соочија со раст на бројот на случаи на КОВИД-19, мали залихи и бавна имунизација на населението.
