Во стариот дел на Лисабон во Португалија постои една мала продавница, т.н. „болница“ за кукли во која со големо внимание, грижа и љубов се собираат и поправаат кукли, веќе петта генерација.
Секоја од куклите има свој „болнички картон“, а за нив се грижат вештите раце на тројца „доктори“, кои со „оперативни зафати“ им ги враќаат очите, рацете или им „пресадуваат“ нова коса, избирајќи меѓу стотиците „резервни делови“ наредени во фиоки.
„Болницата“ е основана во 1830 година, а туристичките водичи ја опишуваат како „една од најстарите болници за кукли, која е се уште оперативна и е една од најдобрите продавници за играчки во светот“
Горда на добриот глас, сопственичката Мануела Кутилеиро, и понатаму останува скромна. „Ние работиме во нашата болница и не се грижиме за рекорди и статистики“, изјави за АФП.
Нејзини клиенти се „музеи и колекционери, а главно приватни лица кои се сентиментално врзани за тие предмети“, вели поранешната наставничка која сега има 72 години.
Околу 4 000 кукли се наредени во просторијата на работилницата каде што се грижат за „болните“. Таму може да се најде стогодишна кукла со глава од порцелан, кукли во народни носии од различни делови на Португалија и неколку модерни барбики.
