Во прашање е пореметување до кое доаѓа поради затворање на дишниот пат со паѓање на јазикот кон задниот дел на ждрелото при што се оневозможува протокот на воздухот, односно дишењето. Може да се јави и кај деца и кај возрасни, особено е многу често кај децата поради зголемени крајници, но и кај возрасните ако се настинати, поради тој оток на грлото и затвореност на носот.
Лицата кои се соочуваат со овој проблем престануваат да дишат и до неколку стотици пати во текот на ноќта (како нормален престанок на дишење се смета пет пати во еден час). Се проценува дека околу четири проценти од машката и два проценти од женската популација го имаат овој проблем. Ако не се лекува апнеата може да резултира со висок крвен притисок, аритмии, срцев и мозочен удар, дијабетес, глауком, води кон промени на концентрацијата и појава на артериосклероза.
