Yndyrnat gjithashtu janë pjesë e rëndësishme e të ushqyerit, kryesisht për shkak se ata e ndërtojnë membranën e secilës qelizë, por janë të domosdoshme edhe për funksionimin e steroideve (testosteronit) dhe hormoneve seksuale femërore (estrogjenit dhe progesteronit), por edhe për vitaminat liposolubile (vitamina të tretshme në yndyrë) – A, D, E dhe K. Marrja e tyre mund të shkojë deri në 25-30% të konsumit total të energjisë, por vetëm për shkak të vlerës së tyre të lartë kalorike (1 gram yndyrë jep 9 kcal).
Sportistët kryesisht duhet të zgjedhin vajra të origjinës bimore, si: fruta të thatë (arra, bajame, lajthi, kikirikë), të paktën 2 deri 3 lugë në ditë të ndonjërit prej vajrave në sallatë (vaj luledielli, vaj ulliri, misri, liri ose vaj nga farat e rrushit), por edhe vaj peshku – për shkak të acideve yndyrore omega-3.
VITAMINIAT
Vitamina B1 hyn në përbërjen karboksilazës, e cila mundëson dekarboksilimin e acidit piruvik (metabolizmi i sheqernave), vitamina B2 merr pjesë në ndërtimin e fermentit të verdhë të frymemarrjes, vitamina B6 është burim i enzimave pjesëmarrëse në pre-aminimin, pre-sulfimin etj., (metabolizmi i proteinave), vitamina C është pjesë përbërëse e lipazës (metabolizmit të yndyrnave), vitamina A merr pjesë në sintezën e pigmentit viziv (rodopsina), vitamina D merr pjesë në ndërtimin e kockave përmes pjesëmarrjes në metabolizmin e kalciumit dhe fosforit. Sipas Katch; F. I., McArdle W.D. (1993), në kushte të temperaturave të ulëta, organizmi ka kërkesa të rritura të vitaminave A, B dhe C, në kushte të mbinxehjes – të vitaminës B1 dhe C, me konsumin e rritur të karbohidrateve tek të ushqyerit nevojitet më shumë vitaminë B1, por me rritjen e aktivitetit fizik shtohen kërkesat për vitaminat B1, PP dhe C. Vitaminat A, B1, PP dhe C mund të rritin drejtpërdrejt efektivitetin e stërvitjes dhe të përmirësojnë formën sportive.
MINERALET
Mineralet hyjnë në përbërjen e disa lëndëve ushqyese. Për shembull, sulfuri, hekuri, fosfori – hyjnë në përbërjen e proteinave të citoplazmës, fosfori – në lipoidet, hekuri – në hemoglobinën dhe mioglobinën, jodi – në hormonet e gjëndrës tiroide, kalciumi dhe fosfori – në strukturën e eshtrave, fosfori merr pjesë në proceset glikolitike dhe oksidative, kalciumi dhe magnezi marrin pjesë në irritimin neuromuskular, etj. Mungesa e mineraleve në ushqim çon në çrregullimin e funksioneve në organizëm. Por vëmendje kryesisht duhet t’i kushtohet: natriumit, kaliumit, kalciumit, magnezit, fosforit, hekurit dhe jodit, për shkak të rolit dhe rëndësisë së tyre në metabolizmin e sportistëve, si dhe për shkak të harxhimit më të madh të tyre gjatë stërvitjes.
