Идеално време е да почнете со пливање! Без разлика дали сакате да пливате или пливањето ви е асоцијација на опуштени летни денови на море, факт е дека тоа има посебен ефект врз човечкото тело и стручњаците го препорачуваат колку што е можно повеќе, па макар и на базен. Еве зошто е пливањето важно за нашиот организам…
Ги зајакнува сите мускули во телото
Пливањето е еден од спортовите што ги активира речиси сите мускулни групи. Ги зајакнува повеќето мускули во телото, па на тој начин влијае на рацете, рамената, грбот, градите и нозете, ја подобрува работата на зглобовите, го зајакнува кардиоваскуларниот систем, а не го оптеретува ‘рбетот и зглобовите.
Има ефект на опуштање
Пливањето, исто така, има релаксирачки ефект врз целиот организам. Се препорачува да се плива околу 30 минути дневно за комплетен „третман на опуштање“, и тоа да се повторува најмалку три пати во неделата, а најдобро е секој ден. Обидете се и ќе ја забележите разликата, ќе видите дека ќе се чувствувате подобро, а нивото на стрес ќе се намали.
Поради многу малиот ризик од повреди, пливањето се смета за совршен спорт за бремени жени, за луѓе кои имаат проблеми со болки во зглобовите, ‘рбетот, спортисти кои претрпеле повреди, како и луѓе кои имаат проблеми со координација на движењата.
Ги согорува калориите
Покрај наведените предности, пливањето го обликува целото тело и ни овозможува да го симнеме вишокот на килограми и да ги отстраниме масните наслаги, односно целулитот. Со пливање за еден час можеме да согориме 500 до 700 калории.
Влијае на кардиоваскуларниот систем
Со оглед на тоа дека водата поттикнува подобар проток на крв во мускулите, особено ако е потопла, со него ќе го зајакнете и срцевиот мускул. На тој начин ќе го продлабочите вашето дишење и ќе му обезбедите на телото поголема количина на кислород, како и стабилизација на крвниот притисок.
Подобра форма
Со редовното пливање се постигнува подобра кондиција и се стимулира губење на тежината.
