Недоволното лачење плунка од плунковите жлезди е состојба која се нарекува ксеростомија или сува уста. Се смета како секундарен несакан ефект при земање на некои лекови, најчесто антидепресиви, но може да претставува симптом за некои други заболувања.
Ова нарушување може да предизвикува проблеми со зборувањето, исхраната и при голтањето. Доколку во устата има помалку плунка храната потешко се џвака и се голта особено цврстата храна и при тоа предизвикува абразија во устата. Недостатокот на плунка фаворизира акумулација на бактерии кои понатаму предизвикуваат кариес и оштетување на гингивата, како и габични инфекции.
При состојбата на сува уста се зголемува и ризикот од халитоза ( лош здив), забен кариес и болести на гингивата.
Ксеростомијата се јавува како резултат на нарушена функција на плунковните жлезди кои лачат многу малку плунка. Без разлика дали трае неколку дена или подолг период, сувата уста е ризик фактор за појава на болести во усната празнина. Со тек на времето може да почувствувате проблеми со вкусот, потешкотии при голтање, пукнатини на аголот од усните, пецкање и жарење на јазикот.
Постојана ксеростомија може да биде предизвикана и од радиотерапевтски третмани против рак на устата, главата и на вратот.
Лицата кои имаат ксеростомија проследена со други симптоми треба да се консултираат со стоматолог за да се утврдат дали тие симптоми се причина за ксеростомијата. Потребно е да направи тест за да утврди дали плунковните жлезди нормално функционираат.
