Помеѓу 7 до 11 илјади лица во земјава годишно доживуваат мозочен удар, а околу 70.000 од нив живеат со последици. Во 90% од случаевите, мозочниот удар може да се спречи ако се препознаат ризик факторите.
Уште денес можете да превземете чекори за да го намалите ризикот од мозочен удар. Усвојте добри, и отфрлете ги лошите животни навики.
Редовна контрола на крвниот притисок
Ако имате зголемен крвен притисок, а не водите сметка за него, шансите да доживеете мозочен удар растат. Идеален крвен притисок е 120/80. Ако притисокот ви е повисок од идеалниот, разговарајте со својот лекар за промени во исхраната и физичката активност која помага во негова нормализација. Доколку тоа не биде доволно, лекарот по дополнителните анализи ќе ви препише лекови.
Испотете се
Телесната активност е одличен начин за постигнување на здрава телесна тежина и нормален крвен притисок – два важни фактора во превенција на мозочниот удар. Доколку досега не сте биле активни и не сте во најдобра форма, посоветувајте се со својот лекар.
Држете го стресот под контрола
Ако постојано сте под стрес, шансите за мозочен удар се многу поголеми. Се смета дека причината може да биде во тоа што стресот поттикнува воспалителни процеси во организмот.
Ослободете се од вишокот килограми
Дебелината води кон дијабетес и зголемен крвен притисок, кои пак го зголемуваат ризикот од мозочен удар. Ризик значајно ќе го намалите ако намалите само пет килограми за почеток. Дневниот внес на калории ограничете го на 2000 и почнете редовно да вежбате.
Проверете го нивото на холестерол
Зголеменото ниво на лошиот (ЛДЛ), а ниско ниво на добар (ХДЛ) холестерол ја зголемува опасноста од затнување на артериите, што спречува нормален проток на крвта во телото и го зголемува ризикот од мозочен удар. Контролираниот внес на заситени и на транс масти ќе го намали нивото на лошиот, а редовната физичка активност ќе го зголеми нивото на добриот холестерол. Ако и тоа не е доволно, лекарот ќе ви препише терапија.
Држете го шеќерот под контрола
Дијабетесот го пореметува користењето на глукоза во организмот – важен извор на енергија за мозокот и клетките кои ги градат мускулите и ткивото. Таквата состојба го зголемува ризикот о дмозочен удар поради што е важно редовно да се контролира нивото на шеќерот во крвта и да се почитуваат насоките од лекарот.
Обрнете внимание на отчукувањата на срцето
Атријалната фибрилација е најчеста аритмија кај општата популација која пет пати го зголемува ризикот од мозочен удар. Ако заебележите дека срцето не ви чука правилно, побарајте лекарски совет. Доколку се работи за атријална фибрилација, лекарот може да ви препише терапија која ги намалува отчукувањата на срцето и го намалува ризикот од крвни згрутчувања.
Јадете влакна
Држете се до магичниот број 7: за секои 7 грама влакна кои дневно сте ги внеле во организмот, ризикот од мзочен удар опаѓа за 7%. Дневно треба да се внесат 25 грама влакна.
Повремено уживајте во темно чоколадо
Флавоноидите се растителни хемикалии во какаото кои имаат позитивен ефект на здравјето. Помагаат при смирување на воспалителните процеси, а тоа може да го намали притисокот на срцето. Истражувањата покажуваат дека само малку темно чоколадо дневно, помага во превенција на срцев и на мозочен удар кај лицата кои имаат поголем ризик од развој на срцеви болести.
Оставете ги цигарите
Пушењето го зголемува ризикот од згрутчување на крвта, задебелување на ѕидовите и стеснување на крвните садови и предизвикува таложење на анслаги во крвните садови, а сето тоа не прави подложни на мозочен удар.
Бирајте вистинска храна
Балансираната исхрана богата со овошје, зеленчук, риба, немасно месо и полнозрнести житарки може да го намали нивото на лошиот холестерол. Тоа ја намалува веројатноста од таложење на наслаги во артериите и создавање на опасни згрутчувања.
